پانی کے ہر قطرے سے استفادہ کرنے کا تلگو ریاستوں کا عزم

آندھراپردیش اور تلنگانہ کے وزرائے اعلیٰ نے آج حیدرآباد کے پرگتی بھون میں ملاقات کی۔ کے سی آر اور جگن کی یہ پہلی ملاقات تھی جو کافی خوشگوار ماحول میں ہوئی۔

اس میٹنگ میں تلگوریاستوں کے وزرا اعلیٰ نے دونوں ریاستوں کے کونے کونے تک پانی پہنچانے کا عہد کیا۔ تلگوریاستوں کو سرسبز و شاداب بنانے کےلیے ایک دوسرے کا تعاون کرنے کا چندرشیکھر راؤ اور وائی ایس جگن موہن ریڈی نے وعدہ کیا۔
پرگتی بھون میں منعقدہ اجلاس میں دریائے کرشنا اور گوداوری کے پانی کے ہر قطرہ کو استعمال کرنے کا ارادہ ظاہر کیا گیا جس کےلیے راہیں تلاشنے کا بھی عہد کیا گیا۔
وزرا اعلیٰ نے دونوں ریاستوں کے مسائل کو بات چیت کے ذریعہ حل کرنے کا ارادہ ظاہر کیا۔ اسی طرح پانی کی تقسیم کے مسئلہ پر دونوں رہنماؤں نے تلگوعوام کے حق میں کام کرنے کی بات کہی۔
کے سی آر اور جگن موہن ریڈی نے پینے کےلیے اور انڈسٹریز کےلیے دونوں ریاستوں کے چپہ چپہ تک پانی پہنچانے کے مقصد کا اظہار کیا۔
اجلاس میں آندھراپردیش کے علاقہ رائلسیما اور تلنگانہ کے محبوب نگر اور نلگنڈہ اضلاع میں پانی کی کمی کو دور کرنے کے سلسلہ میں فیصلے لئے گئے۔
دونوں رہنماؤں، کرشنا اور گوداوری دریاؤں کے زیادہ سے زیادہ پانی سے استفادہ کرنے کےلیے ماسٹر پلان تیار کرنے کے لیے کوشاں ہیں۔
واضح رہے کہ ان دونوں دریا کا پانی بڑی مقدار میں بغیر کسی استعمال کے خلیج بنگال میں چلا جاتا ہے۔
دونوں ریاستوں کے وزرا اعلیٰ نے گوداوری اور کرشنا کے پانی کے ہر قطرہ کو ضائع ہونے سے بچاتے ہوئے تلگو ریاستوں کے کونے کونے تک پہنچانے کے لیے کام کرنے کا فیصلہ کیا ہے۔