ضلع پلوامہ کی سڑکیں کوڑے دان میں تبدیل

ریاست جموں کشمیر کے جنوبی ضلع پلوامہ میں ڈمپنگ سائٹ نہ ہونے کے سبب ضلع میں سڑک کنارے، بازاروں اور گلیوں میں کوڑے کرکٹ اور گندگی کے ڈھیر دیکھے جا سکتے ہیں۔

جگہ جگہ گندگی کے ڈھیر ہونے سے وہاں کتے جمع ہو جاتے ہیں جس سے اسکولی بچوں کو وہاں سے گزرنے میں ڈر محسوس ہوتا ہے۔

ای ٹی وی بھارت کے ساتھ بات کرتے ہوئے مقامی باشندوں کا کہنا تھا کہ سڑکوں کے اطراف و اکناف میں گندگی اور کوڑے کرکٹ سے اٹھنے والی بدبو سے راہگیروں اور رہائشیوں کو شدید مشکلات کا سامنا کرنا پڑتا ہے۔

انکا مزید کہنا تھا کہ زرعی زمیں کے آس پاس گندگی سے زمین کے بنجر بننے کے خطرات بڑھ گئے ہیں۔

مقامی لوگوں نے مزید بتایا کہ منیونسپل کمیٹی پلوامہ نے کچھ عرصہ قبل ضلع سے نکلنے والا کوڑا کرکٹ اونتی پورہ ڈمپنگ سائٹ میں ڈالنا شروع کیا تھا تاہم اونتی پورہ انتظامیہ کی ممانعت کے بعد اب ضلع پلوامہ میں ڈمپنگ سائٹ کی عدم موجودگی سے لوگوں کی پریشانیوں میں اضافہ ہوا ہے۔