محکمہ موسمیات نے منگل کو ایک بلیٹن جاری کر کے اطلاع دی کہ طوفان 11 جون کو صبح دو بجکر 30 منٹ پر بحیرہ عرب کے مشرقی وسطی حصے کے اوپر تک پہنچ گیا ہے۔
طوفان 'وایو' اب لکشدیپ سے 410 كلو ميٹر، ممبئی سے 600 کلومیٹر اور گجرات سے 740 کلومیٹر کے فاصلے پر ہے۔ اگلے 24 گھنٹوں کے دوران طوفان کے شدید رخ اختیار کرنے کا خدشہ ظاہر کیا جارہا ہے۔
طوفان کے 13 جون کی صبح تک گجرات کے پوربندر اور مہوا کے ساحل تک پہنچنے کا امکان ہے۔
'وایو' کی وجہ سے 110-120 كلويٹر فی گھنٹہ کی رفتار سے تیز ہوائیں چل سکتی ہیں۔ طوفان کے گجرات میں ضلع گِر سومناتھ کے ویراول ساحل پر ٹکرانے کا امکان ہے۔
گجرات کے چیف سکریٹری جے این سنگھ نے بتایا کہ محکمہ موسمیات سے ملی تازہ ترین اطلاعات کے مطابق طوفان 'وایو' 13 جون کو صبح چھ سے سات بجے کے درمیان ویراول اور مهوا کے درمیان یا زیادہ امکان ہے کہ ویراول کے قریب زمین سے ٹکرائے گا۔
انہوں نے کہا کہ ریاستی انتظامیہ کسی بھی صورت حال سے نمٹنے کے لئے مکمل طورپر تیار ہے۔ اس سلسلہ میں وزیر اعلی نے جائزہ لیا ہے۔ این ڈی آر ایف کی ٹیمیں، فوج، بحریہ اور کوسٹ گارڈ اپنی اپنی ٹیموں کے ساتھ تال میل سے کام کریں گی۔
ایک سوال کے جواب میں انہوں نے کہا کہ حال ہی میں خلیج بنگال میں آئے طوفان 'فانی' سے نمٹنے کی اڑیسہ حکومت کی قابل ستائش کوشش کے پیش نظر وہ وہاں کے چیف سکریٹری سے بھی بات کریں گے اور دیکھیں گے کہ ضرورت پڑنے پر ان کے تجربے کا فائدہ 'وایو' کے معاملے میں کس طرح لیا جاسکتا ہے۔
