آکاش وجے ورگیہ کو ضمانت

بھارتیہ جنتاپارٹی کے جنرل سکریٹری کیلاش وجے ورگیہ کے ایم ایل اے بیٹے آکاش وجے ورگیہ کو آج شام بھوپال کی خصوصی عدالت نے ضمانت دیدی۔

اندور تین اسمبلی حلقہ سے رکن اسمبلی آکاش کے وکیل پوشیہ متر بھارگوا نے بتایاکہ خصوصی جج سریش سنگھ نے شام کو آکاش کو ضمانت دیدی۔ اب ہم اس سلسلہ میں ضروری کارروائی مکمل کرتے ہوئے آگے قدم اٹھائیں گے۔
اس معاملہ میں عدالت نے دونوں فریقوں کی دلیلیں سننے کے بعد شام کو فیصلہ سنایا۔
آکاش وجے ورگیہ کی ضمانت عرضی پر ارکان اسمبلی اور ارکان پارلیمنٹ کے معاملات کی سماعت کے لیے مخصوص عدالت کے جج سریش سنگھ نے یہاں کی سماعت کی۔
کل اس معاملہ میں سماعت شروع ہونے کے بعد جج نے اس معاملہ کی کیس ڈائری اندور سے لائے جانے کا حکم دیا تھا۔
واضح رہے کہ مدھیہ پردیش کے اندور شہر کے مہاتما گاندھی روڈ تھانہ پولیس اسٹیشن نے بی جے پی کے جنرل سکریٹری کیلاش وجے ورگیہ کے بیٹے اور رکن اسمبلی آکاش وجے ورگیہ اور ان کے نامعلوم دس حامیوں کے خلاف میونسپل کارپوریشن کے ملازمین کے ساتھ مار پیٹ کرنے کے الزام میں معاملہ درج کیا ہے۔
گنجی کمپاونڈ علاقے میں واقع ایک خستہ حال مکان منہدم کرنے کے لیے میونسپل کارپوریشن کا عملہ پہنچا تھا۔رکن اسمبلی آکاش وجے ورگیہ نے میونسپل حکام کو کارروائی نہیں کرنے کی ہدایت دے کر وہاں سے جانے کے لیے کہا۔ اس درمیان حکام کے واپس نہیں جانے پر وجے ورگیہ برہم ہو گئے۔
آکاش پر الزام ہے کہ انہوں نے کرکٹ کھیلنے کے بلے سے میونسپل کارپوریشن کے ایک بلڈنگ انسپکٹر اور بلڈنگ افسر کے ساتھ مارپیٹ کی۔ اس دوران وجے ورگیہ کے حامیوں نے موقع پر موجود میونسپل کارپوریشن کے عملہ کے دیگر لوگوں کے ساتھ مارپیٹ شروع کردی۔