سعودی عرب میں دو آئیل تنصیبات کو شنانہ بنائے جانے کے بعد تیل کی سپلائی کو مسدود کردیا گیا جبکہ تنصیبات کو معمولی نقصان ہوا۔
مارچ 2015 سے مملکت سعودی کے خلاف برسرپیکار حوثی باغیوں کے ترجمان محمد عبدالسلام نے کہا کہ 7 ڈرونز کی مدد سے سعودی عرب آئل تنصیبات کو نشانہ بنایا گیا۔ انہوں نے اسے کامیاب آپریشن قرار دیا۔
ترجمان نے مزید کہا کہ یمنی عوام کے خلاف کئے جارہے مظالم کا ہم نے بدلہ لیا ہے۔
سعودی وزیر توانائی خالد الفالیح کے مطابق مشرقی صوبے کی یانبو پورٹ پر یمن سے حوثی باغیوں نے 2 پمپنگ اسٹیشنز کو ڈرون کی مدد سے نشانہ بنایا جس کے نتیجے میں تنصیبات کو معمولی نقصان پہنچا۔ڈرون حملے کے بعد پمپنگ اسٹیشنز میں آگ لگ گئی جس کے بعد ملک کی سب سے بڑی آئل کمپنی آرامکو نے تیل کی ترسیل روک دی۔
سعودی عرب نے یمن سے ہونے والے ڈرون حملے کو بزدلانہ حملہ قرار دیتے ہوئے کہا کہ حملے میں نہ صرف سعودی عرب کو نشانہ بنایا گیا بلکہ یہ حملہ عالمی اقتصادیات اور دنیا کو فراہم کی جانے والی پیٹرولیم مصنوعات کے لیے خطرہ ہے۔
