دہلی: 'کہاں جائیں سرکار! اب تو آسمان ہی سائبان ہے'

جب ڈی ڈی اے کے بلڈوزر مکانوں کو زمین دوز کر رہاتھا تو ان یہاں کے مکینوں میں سے ایک جوڑے 50 سالہ سوریہ نارائن اور ان کی اہلیہ نے مبینہ طور سے خودکشی کی کو شش کی۔

دارالحکومت دہلی کے بوانا علاقے کے آنند وہار کالونی میں ڈی ڈی اے نے کئی گھروں پر بلڈوزر چلا کر مکانات کو منہدم کردیا۔
اس علاقے میں ہائی وے بنانے کا پلان ہے، جس کے تحت ڈی ڈی اے 25 مکانوں کو منہدم کر رہی ہے۔

مقامی لوگوں کے مطابق یہ کالونی 1984 میں بسی تھی اور تب سے ہی وہ لوگ اس علاقے میں رہ رہے ہیں۔اب اچانک ان کے مکانوں کو توڑا جا رہاہے۔مقامی لوگوں کا کہنا ہے کہ ان کے گھر کے بدلے انہیں نہ تو کوئی معاوضہ ملا ہے اور نہ ہی رہنے کی جگہ۔ حد تو یہ ہے کہ ان کے گھر کے ملبوں کو ٹرکوں میں بھر کر لے جایا جا رہاہے۔ہائی وے بنانے کے لیے کالونی کے 25 مکانوں کو توڑا جا رہا ہے، ان میں سے 15 مکانوں کو توڑا جا چکا ہے۔جب ڈی ڈی اے کے بلڈوزر مکانوں کو زمین دوز کر رہاتھا تو ان یہاں کے مکینوں میں سے ایک جوڑے 50 سالہ سوریہ نارائن اور ان کی اہلیہ نے مبینہ طور سے خودکشی کی کو شش کی۔سوریہ نارائن کی موت ہو گئی، لیکن ان کی اہلیہ کو وقت رہتے امبیڈکر اسپتال پہنچا دیا گیا، جہاں انکی حالت ابھی بھی نازک بنی ہوئی ہے۔