ریاست اترپردیش کے شہر مرادآباد کا سیاسی انتخاب تین طرفہ ہے ایک طرف تو بی جے پی کے امیدوار سرویش کمار ہیں دوسری طرف کانگریس پارٹی سے عمران پرتاپ گڑھی ہیں اور ایس پی بی ایس پی راشٹریہ لوک دل اتحاد سے سماجوادی پارٹی کے امیدوار ڈاکٹر ایس ٹی حسن انتخابی میدان میں ہیں۔
مرادآباد کی سیاست میں اس وقت ماحول گرم ہے اور ایک دوسرے پر الزمات لگائے جانے کا بھی سلسلہ جاری ہے۔
ای ٹی وی بھارت اردو کے نمائندے شاہنواز اختر نے جب سماج وادی پارٹی کے موجودہ اسپیکر اور سابق ریاستی وزیر محمد عباس سے بات چیت کی تو انھوں نے کانگریس کے امیدوار عمران پرتاپ گڑھی کے خلاف متنازع بیان دیا۔
انہوں نے کہاکہ سماج وادی پارٹی کے امیدوار ڈاکٹر ایس ٹی حسن پیشہ سے ایک ڈاکٹر ہیں اور ایم بی بی ایس اور ایم ایس ہیں، اعلیٰ ڈگری ہونے کے باوجود بھی ان کی فیس محض 30 روپے ہے، دوسری طرف کانگریس کے امیدوار عمران پرتا گڑھی کے فن اور ہنر کی فیس دو لاکھ سے لے کر ڈھائی لاکھ تک ہے۔
عباس نے عمران پرتاپ گڑھی کے فن کو طوائف کے پیشے سے تشبیہ دی۔
ان کا کہنا تھاکہ جس طرح سے ایک طوائف اپنے فن کی قیمت زیادہ سے زیادہ لیتی ہیں اسی طرح عمران پرتاپ گڑھی اپنے فن کی قیمت بھی زیادہ سے زیادہ لیتے ہیں۔
واضح رہے کہ عمران پرتاپ گڑھی مرادآباد لوک سبھا سے کانگریس کے امیدوار ہیں۔
مراد آباد لوک سبھا انتخابات کے لیے 23 اپریل کو ووٹنگ ہونی ہے۔
