سنٹرل ریلوے کے ممبئی سکشن نے بغیر ٹکٹ یا جعلی دستاویزات کے ساتھ سفر کرنے والے مسافروں کے خلاف قانونی کارروائی کرتے ہوئے گذشتہ دو مہینوں کے دوران 75 ہزار افراد کے خلاف قانونی چارہ جوئی کرتے ہوئے کروڑوں روپے کے جرمانے عائد کیے ہیں۔
وسطی ریلوے کے پی آر او شیواجی ستار نے بتایا کہ یکم اپریل سے اب تک لوکل ٹرینوں سے غیرقانونی طور پر سفر کرنے والے 75 ہزار 793 مسافروں کے خلاف قانونی کاروائی کرتے ہوئے 3 کروڑ 97 لاکھ روپئے کے جرمانے وصول کیے گئے۔
حکومت کی جانب سے جاری کی گئی ہدایات کے مطابق 14 اپریل کے بعد سے عام مسافروں کے لیے لوکل ٹرین کی خدمات کو معطل کر کے صرف ایمرجنسی خدمات انجام دینے والے اہلکاروں کو ہی مقامی ٹرینوں پر سفر کرنے اجازت دی گئی تھی۔ اس کے علاوہ17 اپریل سے 21 مئی کے درمیان ماسک کے بغیرلوکل ٹرینوں میں سفر کرنے والے1؍ہزار106؍ مسافروں کے خلاف بھی کاروائی کی گئی ہے۔
ریلوے کی جانب سے جاری اعداد و شمار کے مطابق808؍ایسے مسافروں کو پکڑا گیا ہے جو جعلی دستاویزات کی بنائ پر سفر کر رہے تھے۔ ایسے تمام مسافروں سے فی مسافر500؍روپئے جرمانہ وصول کیا گیا ہے۔تحقیقات سے پتہ چلا ہے کہ جعلی مسافروں کے پاس سے زیادہ تر شناختی کارڈ ممبئی مہانگر پالیکاکے نام کا سامنے آیا ہے۔
