راجستھان میں جودھپور کی سی جے ایم دیہات کی عدالت میں کالے ہرن کیس میں شکار کے دوران لائسنس گم ہوجانے کے حوالے سے آج سماعت ہوئی۔
سماعت کے دوران سلمان خان کے وکیل نے کورٹ میں کہا کہ سلمان خان کا مقصد کسی بھی طرح کورٹ میں جھوٹا حلف نامہ داخل کرنا نہیں تھا۔ لہذا ان کے خلاف کوئی کارروائی کرنا مناسب نہیں ہو گا۔
جھوٹے حلف نامے کے معاملے میں ابت ک تقریباً 13 سماعت ہوئی ہیں عدالت 17 جون کو اس پر اپنا فیصلہ سنا ئے گی۔
اگر کورٹ سلمان کو چھوٹاحلف نامہ داخل کرنے کا قصوروار قرار دیتی ہے تو سلمان خان کو ایک مزید مقدمے کا سامنا کرنا ہوگا۔
سلمان خان نے جس ہتھیار کے لائسنس کے لیے کورٹ میں حلف نامہ داخل کیا تھا، اس معاملے سے عدالت سلمان کو بری کر چکی ہے، لیکن جھوٹے حلف نامے کے معاملے میں سماعت باقی رہ گئی تھی۔
اگر عدالت جھوٹے حلف نامے کے حوالے سے سلمان خان کو قصوروار گردانتی ہے تو سلمان خان کو زیادہ سے زیادہ سات برس قید کی سزا ہو سکتی ہے۔
سلمان خان پر الزام ہے کہ سنہ 1998 میں فلم 'ہم ساتھ ساتھ ہیں' فلم کی شوٹنگ کے دوران انہوں نے کالے ہرن کا شکار کیا تھا۔ شکار کے وقت سلمان خان کے ساتھ اداکارہ نیلم، تبو، سونالی بیندرے اور اداکارسیف علی خان بھی موجود تھے۔
شوٹنگ کے دوران سلمان خان کی جانب سے ہتھیار کا لائسنس گم ہوجانے کے حوالے سے حلف نامہ داخل کرایا گیا تھا۔ اس کے بعد معلوم ہوا کہ ہتھیار کا لائسنس ممبئی پولیس کو کمشنر کو تجدید کے لیے دیا گیا ہے۔
اس کے بعد وکیل استغاثہ نے سلمان خان پر حلف نامہ کو جھوٹا قرار دے کر کورٹ کو گمراہ کرنے کا الزام عائد کیا تھا اور کورٹ میں عرضی داخل کرکے آئی پی سی کی دفعہ 340 کے کارروائی کی مانگ کی تھی۔
سلمان خان پر کالے ہرن کے شکار اور غیر قانونی ہتھیار استعمال کرنے کا الزام عائد کیا گیا اور دیگر اداکاروں پر سلمان کو شکار کے لیے اکسانے کا الزام عائد کیا گیا تھا۔
واضح رہے کہ کچھ وقت پہلے سلمان خان کو کالے چنکارا (بلیک بگ) کیس میں بری کر دیا گیا تھا۔ اس فیصلے کو ریاستی حکومت کی طرف سے سپریم کورٹ میں چیلنج کیا جا چکا ہے۔
