ایران: بس پلٹنے سے آٹھ ہلاک، درجنوں زخمی

ایران میں آج صبح ایک بس حادثہ ہوا ہے، جس میں کم از کم آٹھ مسافروں کی موت ہو گئی جبکہ 36 دیگر زخمی بتائے جارہے ہیں۔

ایران کے دارالحکومت تہران کے مضافات میں آج علی الصباح ایک بس پلٹنے سے آٹھ مسافروں کی موت ہو گئی اور 36 افراد زخمی ہو گئے ہیں۔

ایران کی خبر رساں ایجنسی 'ارنا' نے ٹریفک پولیس کے سربراہ نادر رحمانی کے حوالے سے بتایا کہ ایران کے وسطی كرمان شہر سے آنے والی مسافر بس کے تہران، قم شاہراہ پر پلٹنے سے آٹھ افراد ہلاک ہو گئے۔

نادر رحمانی نے بتایا کہ ایسا خیال کیا جاتا ہے کہ ڈرائیور کو نیند آجانے کی وجہ سے یہ حادثہ پیش آیا ہے۔

واضح رہے کہ تمام زخمیوں کو تہران کے قریبی ہسپتال میں علاج کے لیے داخل کرادیا گیا ہے، جبکہ مزید تفصیلات کا انتظار ہے۔