کانگریس کے ترجمان گورو ولبھ نے پریس کانفرنس سے خطاب کرتے ہوئے کہا، "بی جے پی نے 2014 میں اقتدار سنبھالنے سے پہلے یہ دعوی کیا تھا کہ بھارتی سوئٹزرلینڈ کے بینکوں میں 250 بلین ڈالر (17.5 لاکھ کروڑ) چھپا رکھے ہیں۔ بی جے پی نے یہ وعدہ بھی کیا تھا کہ وہ اس رقم کو ملک واپس لائے گی اور اس کے نتیجے میں ہر بھارتی کو 15 لاکھ روپے ملیں گے۔ "
"پچھلے 7 سالوں میں، مودی سرکار نے صرف بات کی ہے اور کوئی عمل نہیں ہوا۔ حکومت کی طرف سے کی جانے والی کوششوں اور نتائج کے بارے میں قطعی طور پر کوئی اقدام نہیں ہوا۔ ہمیشہ کی طرح، انہوں نے اس موضوع سے ہٹ جانے کا فیصلہ کیا ہے۔ کیونکہ وہ وعدہ پورا کرنے میں بری طرح ناکام ہوچکے ہیں۔
یہ بیان سوئس نیشنل بینک فنڈز کے اعدادوشمار کے جاری ہونے کے بعد سامنے آیا ہے جس میں بتایا گیا ہے کہ 2020 میں بھارتیوں کے ذخائر بڑھ کر 286 فیصد ہوچکے ہیں۔ یعنی گزشتہ 13 سالوں میں یہ سب سے زیادہ ہے۔ کانگریس کے رہنما نے مطالبہ کیا کہ مودی حکومت اس رقم کی نوعیت، ان افراد کے نام اور ان لوگوں کی تفصیلات کا مکمل انکشاف کرے جو پچھلے سال سوئس بینکوں میں رقم جمع کر چکے ہیں۔
کانگریس نے کہا حکومت کو اس پر فوری طور پر کارروائی کرنے کی ضرورت ہے۔ انہوں نے زور دے کر کہا کہ بیرون ملک میں چھپے کالے دھن کے ہر ایک پیسے کو واپس لانے کے لئے حکومت ہر ممکن اقدام کرے۔
