ریاست کرناٹک کے دارالحکومت بنگلور میں عام انتخابات کے پیش نظر اقلیتی طبقوں میں خاص طور پر مسلم سماج میں سیاسی اعتبار سے مسلم نمائندگی کے فقدان کے متعلق باتیں ہورہی ہیں اور قومی سطح کی سیکولر پارٹیوں سے پرزور مطالبہ کیا جا رہا ہے کہ وہ مسلمانوں کو آنے والے الیکشن میں ٹکٹ دے کر مستحکم بنائیں۔
ڈاکٹر نصیر حسین کا کہنا ہے کہ سیکولر پارٹیوں کی یہ ذمہ داری ہے کہ وہ اپنی ساری طاقت اقلیتی امیدواروں کو انتخابات میں کامیاب کرائیں۔
انہوں نے کہا کہ قومی سطح کی سیاسی جماعتوں کو چاہیے کہ وہ اقلیتوں کو محض ٹکٹ ہی نہ دیں بلکہ انہیں اپنے تمام تر وسائل، کیڈر، رہنماؤں کے پشت پناہی سے کامیاب بھی کریں۔
انہوں یہ بھی کہا کہ مسلم رہنماؤں کا بھی یہ فریضہ ہے کہ وہ ان تمام امیدواروں کی ہر ممکن مدد کریں اور مسلم قیادت کو آگے بڑھائیں۔
انہوں نے مزید کہا کہ ایسی سوچ کہ اقلیتی امیدوار جیت نہیں سکتے یہ نامناسب ہے اور ایسے منطق کو ہم مان کر چلیں تو وہ دن دور نہیں کہ شمالی ہند کے چند ریاستوں کی طرح اقلیتوں کو خاص کر مسلمانوں کو ٹکٹ ہی نہ دیے جائیں گے۔
انہوں نے اس بات پر افسوس کا اظہار کیا کہ ریاست کے 16 اضلاع کے ضلع پنچایت میں ایک بھی نمائندے نہیں ہیں۔
