جانچ ایجنسی ای ڈی نے ایئر ایمبولنس کے ذریعے اور ماہر ڈاکٹروں کی ٹیم کی نگرانی میں مفرور چوکسی کو انیٹگوا سے بھارت لانے پیشکش کی ہے۔
واضح رہے کہ ہیرا کاروباری میہول چوکسی پر 13 ہزار کروڑ کے پنجاب نیشنل بینک گھوٹالے میں مرکزی کردار اداکرنے کا الزام ہے۔
میہول چوکسی نے ایک حلف نامہ کورٹ میں داخل کرتے ہوئے کہا تھا کہ' وہ سنگین بیماریوں کی وجہ سے بھارت نہیں آسکتے جس کے جواب میں ای ڈی نے بھی کورٹ میں جوابی حلف نامہ داخل کرتے ہوئے کہا ہے کہ 'وہ انھیں بھارت لانے کے لیے ایئر ایمبولنس اور مہر ڈاکٹروں کی ٹیم روانہ کریں گے۔'
ای ڈی نے اپنے جوابی حلف نامے میں مزید لکھا ہے: ' چوکسی بیماری کا جھوٹا بہانہ بنا کر کورٹ کو گمراہ کرنے کی کوشش کررہا ہے اور اپنے خلاف کی جانے والی کارروائیوں کو ملتوی کرنے کی کوشش کررہا ہے۔'
حلف نامے کے مطابق میہول چوکسی نے کبھی بھی تفتیش میں تعاون نہیں کیا ہے اور چوکسی نے غلط دعوی کیا تھا کہ ای ڈی نے اس کی 6،129 کروڑ کی جائداد قرق کی ہے، جب کہ حقیقت یہ ہے کہ ای ڈی نے چوکسی کی صرف 2،100 کروڑ کی جائداد قرق کی ہے۔
جانچ ایجنسی کا کہنا ہے کہ چوکسی کے خلاف انٹرپول نے غیر ضمانتی وارنٹ بھی جاری کیا تھا۔چوکسی نے آنے سے منع کردیا تھا، جس وجہ سے اسے مفرور اور بھگوڑا قرار دے دیا گیا اور اسے متعدد دفعہ تفتیش میں تعاون کرنے کی پیشکش کی گئی لیکن اس نے ہمیشہ سوالوں کو نظر انداز کیا۔
اس حلف نامہ کے جواب میں چوکسی نے کہا تھا کہ' وہ جیسے ہی صحتیاب ہوگا وہ بھارت واپس آئے گا اور اس نے ای ڈی کے دعوے کو سرے خارج کردیا کہ وہ تحقیقات میں تعاون نہیں کررہا ہے۔
واضح رہے کہ میہول چوکسی اور اس کا بھتیجا نیرو مودی پنجاب نیشنل بینک گھوٹالہ کے کلیدی ملزم ہیں، دونوں ملزمیں گزشتہ برس ہی ملک چھوڑ کر فرار ہوگئے تھے۔
