ریاست اترپردیش کے شہر علی گڑھ میں واقع علی گڑھ مسلم یونیورسٹی (اے ایم یو) میں طلبہ یونین کی جانب سے یونین ہال میں شام پانچ بجے ایک سمپوزیم منعقد ہوئی، جس کا موضوع ملک کی ترقی میں علی گڑھ مسلم یونیورسٹی کا کردار تھا۔
اس پروگرام میں بھیم آرمی کے صدر چندر شیکھر آزاد، پیس پارٹی کے قومی صدر ڈاکٹر محمد ایوب، قومی صدر انڈین نیشنل لیگ پروفیسر محمد سلیمان، کا طلبہ یونین نے علیگڑھ مسلم یونیورسٹی کے باب سید پر شاندار استقبال کیا گیا۔
چندر شیکھر آزاد سمیت تمام مہمان جب تاریخی طلبہ یونین ہال میں داخل ہوئے تو ان تمام کا روایتی انداز میں استقبال کیا گیا۔
اس سمپوزیم کی شروعات میں طلبہ یونین کے سیکریٹری حظیفہ نے سبھی مہمان کا استقبال کیا اور کہا کہ علی گڑھ مسلم یونیورسٹی پر ہمیشہ الزام لگائے جاتے ہیں اور بدنام کرنے کی کوشش کی جاتی ہے کبھی جناح کی تصویر، کبھی ترنگا یاترا، تو کبھی روزے میں ہندو بھائیوں کو کھانا مہیا نہ کرانے کا الزام۔
طلبہ یونین کے سیکریٹری نے مہمانوں سے کہا کہ اس پروگرام کے بعد آپ پوری یونیورسٹی کا دورہ کریں، اور تمام طلبا سے یہ جاننے کی کوشش کریں کہ جو الزام یونیورسٹی پر لگائے جاتے رہتے ہیں کیا وہ صحیح ہیں؟
واضح رہے کہ طلبہ یونین کی جانب سے ایک افطار پارٹی کا بھی انعقاد کیا گیا تھا۔
