علی گڑھ مسلم یونیورسٹی کے وائس چانسلر پروفیسر طارق منصور کی صدارت میں گزشتہ جمعرات کو اقامتی ہالوں کے پرووسٹوں اور یونیورسٹی کے دیگر حکام کا ایک ورچول اجلاس منعقد ہوا جس میں طلبہ ہاسٹلس کو خالی کروانے کا فیصلہ کیا گیا۔
یونیورسٹی رجسٹرار عبدالحمید (آئی پی ایس) کی جانب سے جاری نوٹس کے مطابق، ہالوں کے پرووسٹوں کی جانب سے طلبہ کے سرپرستوں کے نام الگ سے ای میل اور خط بھی بھیجے جائیں گے تاکہ جو طلبہ ابھی بھی ہاسٹل میں مقیم ہیں وہ ہاسٹل سے اپنے گھر چلے جائیں۔
کورونا وبا کے پیش ہاسٹلس کو خالی کرنے کی ہدایت دی گئی ہے۔ قابل ذکر ہے کہ یونیورسٹی میں فی الحال آن لائن طریقے سے تدریس کا عمل جاری ہے جبکہ امتحانات بھی آن لائن طریقے سے منعقد کرنے پر غور کیا جارہا ہے۔ بیان میں بتایا گیا کہ طلبہ کے مفاد میں ہاسٹلس کو خالی کرایا جارہا ہے تاکہ وہ سلامتی کے ساتھ اپنے گھروں میں رہیں۔
میٹنگ میں یہ بھی فیصلہ کیا گیا ہے کہ اس دوران سبھی پرووسٹ اپنے اپنے ہال کے ریڈنگ روم، کامن روم اور لان کی صفائی کے اقدامات کریں گے۔ اس کے علاوہ یونیورسٹی پراکٹر سے یہ امید کی گئی ہے کہ ان کی ٹیم اور سیکیورٹی عملے کے اراکین کیمپس میں یونیورسٹی لائبریری، کلچرل ایجوکیشن سنٹر سمیت دیگر مقامات کی سلامتی پر خاص توجہ دیں گے۔ آن لائن میٹنگ کے دوران وائس چانسلر نے یونیورسٹی ملازمین سے کووڈ ٹیکہ کاری کے سلسلہ میں بھی اپیل کی اور سبھی شعبہ جات کے سربراہ سے درخواست کی ہے کہ وہ ٹیکہ کاری کے لئے اسٹاف کو ترغیب دیں۔
