کانگریس، ترنمول کانگریس، تلگودیشم پارٹی، نیشنلسٹ کانگریس پارٹی اور راشٹریہ جنتا دل کے رہنماؤں نے الیکشن کمیشن کے سامنے یہ معاملہ اٹھایا۔
کمیشن سے ملاقات کے بعد کانگریس کے ابھیشیک منو سنگھوی، ترنمول کانگریس کے دنیش ترویدی اور نیشنلسٹ کانگریس کے ڈی پی ترپاٹھی نے صحافیوں کو بتایا کہ کمل کے نشان کے نیچے بی جے پی لکھا ہوا ہے۔ ان رہنماؤں نے کہا کہ پہلے بی جے پی کے نشان کمل کے پھول کے نیچے پانی ہونے کی تصویر والا نشان ہوتا تھا لیکن اس بار پانی کی جگہ بی جے پی لکھا ہوا ہے۔
انہوں نے کہا کہ ای وی ایم میں یا انتخابی بیلٹ پیپر میں کسی بھی انتخابی نشان کے پاس کسی بھی سیاسی پارٹی کا نام نہیں لکھا جا سکتا ہے۔ یہ الیکشن کمیشن کی طرف سے مقرر کردہ اصول ہے لیکن بی جے پی نے اس اصول کی خلاف ورزی کی ہے۔
پانچ سیاسی جماعتوں پر مشتمل وفد نے فوری جانچ کرتے ہوئے خاطیوں کو کیفر کردار تک پہنچانے کا الیکشن کمیشن سے مطالبہ کیا۔