Youth Killed Over Interfaith Love: دوسرے مذہب کی لڑکی سے محبت کرنے والے نوجوان کا قتل

کلبرگی میں ایک ہندو لڑکے کا اس لئے قتل کردیا گیا کیوںکہ وہ ایک دوسرے مذہب کی لڑکی سے محبت کرتا تھا اور اس سے شادی کرنا چاہتا تھا لیکن لڑکی کے گھر والے اس رشتے سے خوش نہیں تھے۔

کلبرگی: ریاست کرناٹک کے کلبرگی ضلع میں جمعرات کو ایک مخصوص طبقے سے تعلق رکھنے والی لڑکی سے محبت کرنے کے معاملہ میں 25 سالہ ہندو نوجوان کو قتل کردیا گیا ہے، جس کے بعد علاقے میں سیکورٹی بڑھا دی گئی۔ متوفی کی شناخت ضلع کے وڈی ٹاؤن میں بھیما نگر لے آؤٹ کے رہنے والے وجے کامبلے کے طور پر کی گئی ہے۔ پولیس کے مطابق کامبلے ایک مخصوص مذہب سے تعلق رکھنے والی لڑکی سے محبت کرتا تھا اور اس سے شادی کرنا چاہتا تھا جبکہ لڑکی کے گھر والے اس کے خلاف تھے۔

ابتدائی اطلاعات کے مطابق کامبلے کو بدمعاشوں نے ریلوے پل کے قریب راستے میں پکڑ لیا اور اس پر ہتھیاروں، پتھروں اور اینٹوں سے حملہ کردیا۔ پولیس کا کہنا ہے کہ مقتول پر وحشیانہ حملہ کیا گیا اور بہت زیادہ خون بہنے سے کامبلے نے موقع پر ہی دم توڑ دیا۔ یہ واقعہ بدھ کی رات پیش آیا، جس کے بعد واڑی قصبہ میں حالات کشیدہ ہو گئے۔

پولیس نے کسی بھی ناخوشگوار واقعے سے بچنے کے لیے شہر کے حساس اور انتہائی حساس علاقوں میں حفاظتی انتظامات کو بڑھا دیا ہے۔ واڑی پولیس نے مقدمہ درج کرکے تفتیش شروع کر دی ہے۔