الہٰ آباد ہائی کورٹ کے احاطے میں ملٹی لیول پارکنگ اور وکلاء چیمبر کا سنگ بنیاد رکھنے کے ساتھ جھلوا میں تعمیر کی جانے والی لاء یونیورسٹی کے افتتاحی پروگرام کے موقع پر صدر جمہوریہ رام ناتھ کووند نے کہا کہ 'عدلیہ میں خواتین کی شراکت میں اضافہ ہو کیونکہ خواتین میں سب کو انصاف دینے کا مزاج سب سے زیادہ ہوتا ہے۔ ایک خاتون سسرال، مائیکہ، شوہر اور اولاد میں ہم آہنگی کو استوار کرتی ہے۔
رام ناتھ کووند نے کہا کہ 'عدلیہ میں ابھی تک 12 فیصدی سے بھی کم خواتین کی تعداد ہے جسے بڑھانے کی ضرورت ہے۔ انہوں نے کہا کہ سب کو انصاف ملے اس کے لیے کام کرنا ہوگا۔ عام لوگوں میں عدلیہ کے تئیں اعتماد کو بحال کرنا ہوگا۔ صدر جمہوریہ نے کہا کہ حال ہی میں سپریم کورٹ میں تین خواتین ججوں کی تقرری ہوئی ہے جو کہ تاریخی اور استقبال کے قابل ہے۔
صدر جمہوریہ نے مزید کہا کہ انصاف کے عمل میں تاخیر غریب کے لیے پریشانی کا سبب بنتا ہے۔ ساتھ ہی اس کی غریبی کو اور بڑھاتا ہے۔ سبھی کو وقت سے انصاف ملے۔ عدالتی نظام کم خرچ والا ہو۔ عام شہریوں کی زبان میں فیصلے دینے کا نظم ہو اور خاص کر خواتین اور کمزور طبقات کو انصاف ملے اور سبھی کی سمجھ والا عدالتی نظام ہونا چاہئے۔
انہوں نے کہا کہ 'خواتین کمزور طبقات کو انصاف آسانی سے ملے یہ ہم سب کی ذمہ داری ہے۔ صحیح معنوں میں انصاف پر مبنی سماج کا قیام تبھی ممکن ہے جب دیگر طبقات سمیت عدلیہ میں بھی خواتین کی شراکت داری ہوگی۔
صدر جمہوریہ نے کہا کہ 'ایک وکیل کے طور پر میں دیکھا ہے کہ زیادہ تر نوجوان اور عام کنبوں کے وکلاء ان کے معاون بنیادی سہولیات کی کمی کی وجہ سے متعدد قسم کی پریشانیوں کا سامنا کرتے ہی۔ اس ضمن میں الہ آباد ہائی کورٹ کے ذریعہ بنیادی سہولیات کے لیے تعمیراتی کام سے وکلاء اور ان کے معاونین کے ساتھ ساتھ سبھی عرضی گزاروں کے لیے کافی نفع بخش ثابت ہوگا۔
یو این آئی رپورٹ
