اس سلسلے میں ڈپارٹمنٹ آف اسٹیٹ نے ایک ٹویٹ کر کے کہا کہ 'ہم بھارت کے جموں و کشمیر میں 4جی موبائل انٹرنیٹ کی بحالی کا خیرمقدم کرتے ہیں۔ یہ مقامی باشندوں کے لیے ایک اہم قدم کی نشاندہی کرتا ہے اور ہم جموں و کشمیر میں سیاسی و معاشی بحالی کے منتظر ہیں'۔
خیال رہے کہ تقریباً 18 ماہ کی پابندی کے بعد رواں ماہ پانچ فروری کو جموں و کشمیر انتظامیہ نے 4جی انٹرنیٹ خدمات کی بحالی کی ہے۔
اس سلسلے میں جموں و کشمیر کے ترجمان روہت کنسل نے ایک ٹویٹ میں کہا تھا کہ پورے جموں و کشمیر میں 4 جی انٹرنیٹ خدمات بحال ہو رہی ہے۔
جموں و کشمیر میں 5 اگست 2019 سے یعنی تقریباً 18 مہینوں سے 4 جی انٹرنیٹ سروس معطل تھی۔
حکومت نے کہا تھا کہ 4 جی انٹرنیٹ سروس مرحلہ وار طریقے سے بحال کی جائے گی۔
ترجمان روہت کنسل کے اعلان سے چند گھنٹے قبل بی جے پی جموں و کشمیر یونٹ کے صدر رویندر رینہ نے دعویٰ کیا تھا کہ جموں و کشمیر میں تیز رفتار فور جی موبائل انٹرنیٹ خدمات اگلے دس دنوں کے اندر بحال کر دی جائیں گی۔
انہوں نے کہا تھا کہ وزیر داخلہ امت شاہ نے انہیں ٹیلیفونک بات چیت کے دوران جموں و کشمیر میں فور جی موبائل انٹرنیٹ خدمات کی فوری بحالی کا تیقن دلایا ہے۔'
سابق وزیر اعلی عمر عبداللہ نے جموں و کشمیر میں 4 جی انٹرنیٹ خدمات بحال کیے جانے کے چند گھنٹوں بعد اپنا رد عمل ظاہر کرتے ہوئے کہا تھا کہ 'ملک کا نیا مرکزی علاقہ جموں و کشمیر کے لوگ 18 ماہ تک مشکلات کا سامنا کرنے کے بعد اب 4 جی انٹرنیٹ خدمات کا فائدہ اٹھا سکیں گے۔'
