نئی دہلی/پٹنہ: بہار کے وزیر اعلی نتیش کمار اپوزیشن اتحاد کو مضبوط کرنے کی کوشش کر رہے ہیں۔ اپنے تین روزہ دورے پر دہلی گئے نتیش کمار نے آج کانگریس صدر ملکارجن کھرگے اور راہل گاندھی سے ملاقات کی۔ نتیش کمار کے ساتھ بہار کے نائب وزیر اعلی تیجسوی پرساد یادو اور جے ڈی یو کے قومی صدر للن سنگھ بھی موجود تھے۔
اپوزیشن جماعتوں کو متحد کریں گے: میٹنگ کے بعد رہنماؤں نے مشترکہ پریس کانفرنس کی اور اس بات کا اظہار کیا کہ 2024 کے لوک سبھا انتخابات میں اپوزیشن کا اتحاد نظر آئے گا۔ نتیش کمار، راہل گاندھی اور ملکارجن کھرگے نے کہا کہ وہ تمام پارٹیوں کو ساتھ لے کر اگلا الیکشن لڑیں گے۔ حالانکہ وزیراعظم کون ہوگا؟، جب یہ سوال کیا گیا تو سب نے خاموشی اختیار کر لی۔
بہار کے وزیر اعلیٰ نتیش کمار نے کہا کہ ''یہ اب ختم ہوچکا ہے۔ ہم نے کافی دیر تک بات کی، ملک بھر کی زیادہ سے زیادہ جماعتوں کو متحد کرنے کی کوششیں کرنی ہوں گی۔ یہ فیصلہ کیا گیا ہے کہ ہم مستقبل میں مل کر کام کریں گے۔'' وہیں کانگریس لیڈر راہل گاندھی نے کہا کہ اپوزیشن کو متحد کرنے کے لیے ایک بہت ہی تاریخی قدم اٹھایا گیا ہے، یہ ایک عمل ہے۔ اپوزیشن کے پاس ملک کے لیے جو وژن ہے ہم اسے آگے بڑھائیں گے۔ ہم کسی بھی اپوزیشن پارٹی کو ساتھ لے کر چلیں گے اور ساتھ کھڑے ہوں گے اور جمہوریت اور ملک پر ہونے والے حملے کے خلاف لڑیں گے۔"
وہیں اس موقع پر کانگریس صدر ملیکارجن کھرگے نے کہا کہ ہم نے یہاں ایک تاریخی ملاقات کی ہے۔ آج بہت سے مسائل پر بات ہوئی ہے۔ ہم نے فیصلہ کیا ہے کہ آئندہ الیکشن تمام جماعتوں کو ساتھ لے کر لڑیں گے۔ ہم سب ایک ہی راستے پر آگے بڑھیں گے۔''
