ریاست اتر پردیش میں پولیس نے ضلع بارہ بنکی کے زیدپور تھانہ حلقے کے چھندول موڑ، احمدپور میں UP35AT5855 نمبر کی ایمبولنس سے تلاشی کے دوران متعدد برانڈس کی شراب بر آمد کی ہے۔
بارہ بنکی: ایمبولینس سے شراب برآمد
پولیس کے مطابق یہ شراب ہرایانہ کی ہو سکتی ہے۔ ایس پی پولیس نے بتایا کہ ایمبولینس سے الگ الگ برانڈز کی کل 1804 بوتلیں شراب بر آمد ہوئی ہیں جن کی قیمت تقریبا 5 لاکھ روپے بتائی جا رہی ہے۔
انہوں نے مزید کہا کہ ڈرائیور سمیت گاڑی میں سوار سبھی افراد موقع سے فرار ہو گئے تاہم پولیس نے انکی تلاش شروع کر دی ہے۔ پولیس کے مطابق ’’ایمبولینس کا نمبر فرضی ہے جبکہ ایمبولینس ریاست ہریانہ سے رجسٹرڈ ہے۔‘‘
اس ضمن میں پولیس نے ایف آئی آر درج کرکے مزید تحقیقات شروع کر دی ہے، جبکہ ایمبولینس اور شراب کو پولیس نے ضبط کر لیا ہے۔
