'ہریانہ اور اترپردیش، ہسپتالوں کا سروے کرائیں'

کورونا انفیکشن کے معاملے بڑھنے کے پیش نظر مرکزی وزارت داخلہ نے ہریانہ اور اترپردیش حکومت سے قومی دارالحکومت دہلی خطے کے تحت آنے والے ضلعوں میں دہلی کی طرز پر نجی اسپتالوں میں سروے کرانے کے لئے کہا ہے۔

دہلی میں کورونا کے قہر میں اضافے کے بعد مرکزی وزیر داخلہ امت شاہ نے گزشتہ 15 نومبر کو ایک اعلی سطح میٹنگ میں دہلی کے سبھی پرائیویٹ اسپتالوں میں کورونا انفیکشن کے علاج کی سہولت کا اندازہ لگانے کے لئے کہا تھا۔ ان اسپتالوں کا دورہ کرنے والی ٹیموں نے جمعرات کو اپنی رپورٹ ہیلتھ ڈائرکٹوریٹ کو سونپی۔

وزارت کی ہدایت کے بعد گزشتہ تین دنوں میں دہلی کے اسپتالوں میں 150 آئی سی یو بیڈ کا اضافہ کیا گیا ہے۔ سنٹرل پولیس فورس کے اسپتالوں سے دہلی بلائے گئے 75 ڈاکٹروں اور 251 طبی اہلکاروں نے جمعرات چھتر پور واقع کووڈ اسپتال اور شکور بستی میں بنائے گئے ریلوے کوچ اسپتال میں ڈیوٹی جوائن کرلی۔