امریکہ نے کورونا وائرس کے کیسز میں کمی کے پیش نظر بھارت کا سفر کرنے والے اپنے شہریوں کو 'لیول 1' کا نوٹس جاری کیا ہے۔ لیکن اس دوران امریکہ نے اپنے شہریوں سے کہا ہے کہ وہ دہشت گردی کی وجہ سے جموں و کشمیر کا سفر نہ کریں۔
یو ایس سینٹرز فار ڈیزیز کنٹرول اینڈ پریونشن (سی ڈی سی) کے جاری کردہ نوٹس کے مطابق جن لوگوں نے ایف ڈی اے (فوڈ اینڈ ڈرگ ایڈمنسٹریشن) کی طرف سے منظور شدہ ویکسین کی دونوں خوراکیں لی ہیں، ان کے بھارت میں کورونا سے متاثر ہونے کا خطرہ کم ہے۔
سی ڈی سی نے پاکستان کے لیے بھی ایسا ہی نوٹس جاری کیا ہے، جس میں پاکستان کا سفر کرنے کی منصوبہ بندی کرنے والے امریکی شہریوں کے لیے سفر سے متعلق کورونا کے معیارات میں نرمی کی گئی ہے۔
سی ڈی سی کے مطابق، چار قسم کے سفری نوٹس ہیں۔ لیول 4: انتہائی خطرناک، لیول 3: خطرناک، لیول 2: معتدل، لیول 1: کم۔
امریکی محکمہ خارجہ نے بھارت اور پاکستان دونوں کے لیے ایڈوائزری بھی جاری کی ہے، شہریوں پر زور دیا گیا ہے کہ اگر وہ پاکستان کا سفر کرنے کا ارادہ رکھتے ہیں تودہشت گردی اور تشدد کی وجہ سے اس پر نظر ثانی کریں۔ بھارت کا سفر کرتے ہوئے بھی احتیاط برتیں۔
بھارت کیلئے جاری کردہ ایڈوائزری میں امریکہ نے اپنے شہریوں سے کہا ہے کہ وہ دہشت گردی کی وجہ سے جموں و کشمیر کا سفر نہ کریں۔ اس کے علاوہ بھارت پاکستان سرحد کے 10 کلومیٹر کے دائرے میں نہ جانے کا مشورہ دیا گیا ہے۔
ایڈوائزری میں کہا گیا ہے کہ ’’امریکی حکومت کے پاس مشرقی مہاراشٹر اور شمالی تلنگانہ سے لے کر مغربی بنگال تک دیہی علاقوں میں امریکی شہریوں کو ہنگامی خدمات فراہم کرنے کی محدود صلاحیت ہے کیونکہ امریکی حکومت کے ملازمین کو ان علاقوں میں سفر کرنے کی ضرورت ہے اور اجازت حاصل کرنا ضروری ہے‘‘۔
دریں اثنا، امریکہ نے پاکستان کا سفر کرنے والے اپنے شہریوں پر زور دیا ہے کہ وہ بلوچستان اور خیبرپختونخوا صوبوں کا سفر کرنے سے گریز کریں۔
یہ بھی پڑھیں: امریکہ نے اپنے شہریوں کو میانمار نہ جانے کا مشورہ دیا
ایڈوائزری میں کہا گیا کہ ’’دہشت گرد تنظیمیں پاکستان میں مسلسل حملوں کی منصوبہ بندی کر رہی ہیں۔ اس ملک میں مسلح تصادم کے امکانات بدستور موجود ہیں۔
(یو این آئی)
