بھارت کا غلط نقشہ پیش کرنے پر ٹویٹر انڈیا کے دو سینئر عہدیدار منیجنگ ڈائریکٹر منیش مہیشوری اور نیوز پارٹنرشپ کی سربراہ امرتا ترپاٹھی کے خلاف یوپی کے بلند شہر میں ایف آئی آر درج کرائی گئی ہے۔ اس مہینے میں یوپی میں منیش مہیشوری کے خلاف یہ دوسری ایف آئی آر ہے۔
اترپردیش کے بلندشہر ضلع میں بجرنگ دل کے ایک عہدیدار کی شکایت کی بنیاد پر پیر کی شام کو کھرجہ نگر پولیس اسٹیشن میں ایف آئی آر درج کی گئی تھی۔
دنیا کے نقشے میں مرکز کے زیر انتظام علاقوں لداخ اور جموں و کشمیر کو بھارت کے نقشے کے باہر دکھایا گیا تھا جس پر پیر کے روز متعدد افراد نے سوشل میڈیا پر احتجاج کیا تھا۔ پیر کی شام کو ہی ٹویٹر نے غلط نقشے کو ہٹا دیا۔
یہ بھی پڑھیں: Twitter India Wrong Map: ٹویٹر نے اپنی ویب سائٹ سے بھارت کا غلط نقشہ ہٹا دیا
بجرنگ دل کے مغربی اترپردیش کے کنوینر پروین بھٹی نے شکایت میں کہا کہ 'لداخ اور جموں و کشمیر کو دنیا کے نقشہ میں بھارت کا حصہ نہیں دکھایا گیا۔ یہ کوئی اتفاق نہیں ہے۔ اس اقدام سے مجھ سمیت تمام بھارتیوں کے جذبات مجروح ہوئے ہیں۔'
ٹویٹر انڈیا کے منیجنگ ڈائریکٹر منیش مہیشوری اور نیوز پارٹنرشپ کی سربراہ امرتا ترپاٹھی کو ایف آئی آر میں ملزم نامزد کیا گیا ہے۔ ان کے خلاف آئی پی سی کی دفعہ 502 (2) کے تحت مقدمہ درج کیا گیا ہے۔
یہ بھی پڑھیں: ٹویٹر نے جموں و کشمیر، لداخ کو الگ ملک کے طور پیش کیا
انفارمیشن ٹکنالوجی ایکٹ کی دفعہ 74 (غلط مقصد کے لیے اشاعت) کے تحت بھی اس معاملے میں الزامات عائد کیے گئے ہیں۔
پیر کے روز لوگوں نے ٹویٹر ویب سائٹ کے کیریئر سیکشن میں ٹویپ لائف کے عنوان سے شائع ہونے والے غلط نقشہ پر سخت ردعمل کا اظہار کیا اور سوشل میڈیا پلیٹ فارم کے خلاف سخت کارروائی کا مطالبہ کیا گیا۔ اس سے قبل ٹویٹر نے لیہہ کو چین کا حصہ دکھایا ہے۔
