نئی دہلی: یوکرین روس جنگ کا تنازع جی 20 وزرائے خارجہ کی کانفرنس میں غالب آنے کا امکان ہے اور اس کی وجہ سے دو دن کے اختتام پر مشترکہ اعلامیہ جاری ہونے پر شک ہے۔ خارجہ سکریٹری ونئے موہن کواترا نے بدھ کو ایک پریس کانفرنس میں اس بات پر تبصرہ کرنے سے انکار کر دیا کہ آیا جی ٹوئنٹی وزرائے خارجہ کے دو روزہ اجلاس کے اختتام پر کوئی مشترکہ بیان جاری کیا جائے گا یا نہیں۔ قابل ذکر ہے کہ بھارت کی صدارت میں جی 20 وزرائے خارجہ کا اجلاس 2 مارچ کو ہوگا،جس میں 40 وفود کی شرکت متوقع ہے۔
خارجہ سکریٹری سے پوچھا گیا کہ چونکہ یوکرین روس تنازعہ کے حوالے سے مغربی رہنما اور روس بہت سخت بیانات جاری کر چکے ہیں۔ ایسی صورتحال میں کیا اجلاس میں متفقہ مشترکہ بیان پر اتفاق رائے ہو سکتا ہے؟ اس پر کواترا نے کہا کہ میٹنگ کے نتائج کے بارے میں کسی نتیجے پر پہنچنا مناسب نہیں ہوگا۔ انہوں نے یہ بھی کہا کہ مزید ملاقاتوں میں یوکرین کے تنازع پر توجہ مرکوز کیے جانے کا امکان ہے۔ سکریٹری خارجہ کا یہ بیان ایک ایسے وقت میں آیا ہے جب بنگلورو میں حال ہی میں ختم ہونے والی جی-20 وزرائے خزانہ کی کانفرنس پر روس یوکرین تنازعہ کے سائے بڑے پیمانے پر پڑا، جس کی وجہ سے مشترکہ بیان جاری نہیں کیا جا سکا۔ روس اور چین نے تنازع کے لیے مشترکہ بیان میں 'جنگ' کا لفظ استعمال کرنے پر اعتراض کیا۔ بعد ازاں وزرائے خزانہ کے اجلاس میں صدارتی بیان اور نتائج پر مبنی دستاویز کو جاری کیا گیا۔
