ریاست راجستھان کے دارالحکومت جے پور کے رام گڑھ موٹ علاقے میں واقع کربلا درگاہ کے میدان میں کابینہ وزیر مہیش جوشی کے بیٹے روہت جوشی کی جانب سے منعقد کیے جا رہے کرکٹ ٹورنامنٹ کو لیکر مار پیٹ کی دھمکی دی گئی تھی چونکہ یہ ٹورنامنٹ بغیر وقف بورڈ کی اجازت کے منعقد کیا جا رہا ہے۔ تاہم پولیس نے لڑائی کی دھمکی دینے والے راجستھان مسلم پریشد نامی تنظیم کے صدر یونس چوپدار کو گرفتار کر لیا ہے۔
یونس چوپدار کو پولیس نے آج صبح ان کے گھر سے حراست میں لیا۔ اس سلسلے میں یونس کے اہل خانہ نے میڈیا سے بات چیت کی۔ یونس چوپدار کے بڑے بھائی ذاکر چوپدار کا کہنا ہے کہ ہم لوگ اپنے گھر پر سو رہے تھے، اس دوران 30 سے 40 پولیس والے ہمارے گھر پر آئے اور میرے چھوٹے بھائی یونس چوپدار کو پولیس کی گاڑی میں لے گئے۔
انہوں نے کہا کہ میرے بھائی کو پولیس کہاں لے کر گئی ہے، اس بارے میں ہمیں کچھ نہیں معلوم لیکن ہمیں کافی ڈر لگ رہا ہے۔ انہوں نے کہا کہ میرے بھائی کی جانب سے آج کربلا میدان میں احتجاجی مظاہرے کی کال دی گئی تھی۔ اس سے قبل ہی پولیس نے اس کو حراست میں لے لیا۔ انہوں نے کہا کہ ہم لوگوں کو بھی اپنی جان کا خطرہ لاحق ہے۔
مزید پڑھیں:۔ Making Cricket Patch on Waqf Board land: وقف بورڈ کی زمین پرکرکٹ پچ بنانے کی مخالفت
دراصل وقف زمین پر راجستھان مسلم وقف بورڈ کی جانب سے کسی طرح کا کوئی بھی پروگرام منعقد نہیں کیا جاسکتا لیکن کربلا میدان میں آج کابینہ وزیر کے فرزند کی جانب سے بلا اجازت ہی کرکٹ ٹورنامنٹ منعقد کیا جارہا ہے۔ اس کو لے کر مسلم پریشد کی جانب سے مار پیٹ کی دھمکی دی گئی تھی۔
