مہاراشٹر سماجوادی پارٹی کے رہنما اور رکن اسمبلی ابوعاصم اعظمی نے وزیر اعظم مودی پر تنقید کرتے ہوئے کہا کہ طلاق ثلاثہ کی متاثرہ خواتین کی کفالت کی ذمہ داری اگر حکومت اٹھاتی تو کوئی بات ہوتی تاہم طلاق یافتہ خواتین کے خاوند کو اگر جیل بھیج دیاجاتا ہے تو وہ بے یارو مددگار ہوجاتی ہے۔
انہو ں نے مزید کہا کہ اگر طلاق یافتہ خواتین اپنے خاوند پر طلاق ثلاثہ کے قوانین کے تحت مقدمہ درج کرتی ہے تو کیا ایسی صورتحال میں خاوند بیوی کو اپنائے گا؟ اگر مذکورہ قوانین کے لحاظ سے طلاق ثلاثہ کو ایک ہی طلاق تسلیم کیا جاتا ہے تو کیا از روئے شریعت اس کی اجازت ہے؟
انہوں نے مزید کہا کہ نریندرمودی حکومت نے طلاق ثلاثہ کا قانون صرف شریعت میں مداخلت کے لئے نافذ کیا ہے۔
انہوں نے کہا کہ اس قوانین سے کتنی مطلقہ خواتین کو فائدہ ہوا ہے؟ کتی طلاق یافتہ خواتین خوشحال زندگی بسر کر رہی ہیں؟ انہوں نے الزام عائد کیا کہ حکومت نے صرف ووٹوں کی سیاست اور مسلم ووٹوں کو منتشر کرنے کے لئے یہ قانون بنایا گیا ہے۔
انہوں نے وزیر اعظم نریندرمودی پر تنقید کرتے ہوئے کہا کہ وزیر اعظم یہ کہتے ہیں کہ مسلم خواتین نے مجھے قانون بنانے کے لئے کہا۔ مگر حقیقت تو یہ ہے کہ کوئی بھی مسلم خاتون شریعت کے خلاف قانون نہیں چاہتی، یہ صرف گمراہ کن باتیں ہیں۔ اگر نریندر مودی واقعی خواتین کی فلاح وبہبودی چاہتے ہیں تو وہ ان خواتین کی کفالت کی ذمہ داری قبول کریں۔ تب یہ بات سمجھی جائیگی کہ واقعی مطلقہ خواتین کی حکومت نے مدد کی ہے۔
ابو عاصم اعظمی نے کہا کہ تین طلاق قانون سے صرف اور صرف خواتین کو نقصان پہنچا ہے۔ انہو ں نے کہا کہ حکومت نے اس قانون کے ذریعہ شریعت میں مداخلت کی۔
مزید پڑھیں:
مسجد اقصی کے لئے مسلمان اپنے خون کے آخری قطرہ تک لڑے گا: ابو عاصم اعظمی
انہو ں نے مزید کہا کہ اسلام میں تین طلاق سب سے نا پسندیدہ عمل ہے، اگر تین طلاق پر پابندی عائد ہوئی ہے تو قسطوں میں طلاق واقع ہو سکتا ہے۔ تین طلاق قانون صرف مسلمانوں میں اضطراب پیدا کرنے کے لئے بنایا گیا ہے تاکہ مسلمانوں کے عائلی مسائل اور خاندانی نظام میں مداخلت کی جائے۔
