بی جے پی نے آپسی بھائی چارے میں زہر گھولنے کا کام کیا: سچن پائلٹ

ہمیں اس مقدس تہوار کو باہمی اختلافات بھلاکر سب کو ساتھ لے کر منانا چاہیے اور بھائی چارے کا پیغام دینا چاہیے۔ ہمیں ذات پات اور مذہب سے اوپر اٹھ کر سب کو ساتھ لے کر چلنے کی ضرورت ہے، تب ہی ملک ترقی کی راہ پر گامزن ہوسکتا ہے۔

راجستھان کے سابق نائب وزیر اعلیٰ سچن پائلٹ جمعہ کو اپنے آبائی گاؤں وید پورہ پہنچے۔ انہوں نے گاؤں میں منعقدہ گووردھن پوجا میں شرکت کی۔ اس سے قبل نوئیڈا ڈی این ڈی پر کانگریس پارٹی کے کارکنان نے ان کا والہانہ استقبال کیا۔ سچن پائلٹ ہر سال اپنے آبائی گاؤں وید پورہ میں گووردھن پوجا کرتے ہیں۔

اس موقع پر سچن پائلٹ نے کہا کہ ہمیں اس مقدس تہوار کو باہمی اختلافات بھلاکر سب کو ساتھ لے کر منانا چاہیے اور بھائی چارے کا پیغام دینا چاہیے۔ ہمیں ذات پات اور مذہب سے اوپر اٹھ کر سب کو ساتھ لے کر چلنے کی ضرورت ہے، تب ہی ملک ترقی کی راہ پر گامزن ہوسکتا ہے۔

انہوں نے کہا کہ موجودہ حکومت نے باہمی بھائی چارے میں زہر گھولنے کا کام کیا ہے جس کی وجہ سے ملک میں تناؤ اور انارکی کی فضا پیدا ہوگئی ہے۔ اب عوام بی جے پی کی عوام دشمن پالیسیوں کو سمجھ چکی ہے، آنے والے وقت میں عوام ان کو منہ توڑ جواب دینے والی ہے۔ حال ہی میں ہوئے ضمنی انتخاب میں عوام نے اپنا ذہن صاف کردیا ہے اور آنے والا وقت کانگریس پارٹی کا ہے۔

اس موقع پر کانگریس کے میٹرو پولیٹن صدر رام کمار، ببلی ناگر، دیویندر بھاٹی، راجیندر آوانہ، پھر سنگھ نگر، لیاقت چودھری، جتیندر امباوت، للت آوانا، دانش سیفی، گورو کھنڈیلوال، اشوک شرما، ستیندر شرما، وکرم چودھری اور رضوان چودھری وغیرہ موجود تھے۔