'پڑھائی کی کوئی عمرنہیں ہوتی'

بنارس میں واقع مہاتما گاندھی کاشی ودیا پیٹھ یونیورسٹی میں جشن تقریب اسناد کے موقع پر 62 برس کے سریندر پرتاب نے ایل ایل بی کی ڈگری اور گولڈ میڈل حاصل کیا ہے، ان کے ساتھ ہی تقریبا 42 برس کے ونے کمار نے فیزیکل ایجوکیشن میں ماسٹر ڈگری مکمل کرکے اپنی ڈگری حاصل کی ہے۔ ان دونوں نے اس عمر میں تعلیم حاصل کر یہ ثابت کردیا ہے کہ علم حاصل کرنے کی کوئی عمر مقرر نہیں ہوتی۔

سریندر پرتاب کا کہنا ہے کہ یہ ان کی بچپن کی خواہش تھی کہ وہ قانون کی معلومات حاصل کریں لیکن یہ خواہش مکمل نہ ہو سکی، یہی وجہ ہے کہ محکمہ بجلی کی ملازمت سے سبکدوشی کے بعد مہاتما گاندھی کاشی ودیا پیٹھ یونیورسٹی کے لاء شعبہ میں داخلہ لیا اور نہ صرف داخلہ لیا بلکہ محنت اور لگن سے تعلیم حاصل کی جس کے بعد انہیں گولڈ میڈل حاصل ہوا۔

انہوں نے بتایا کہ' اس تعلیم سے نہ ہی ملازمت کا شوق ہے اور نہ ہی پیسہ حاصل کرنا مقصد ہے، بلکہ دلی خواہش کی تکمیل ہے قانون کی تعلیم کی گہرائی و گیرائی اور ملک و بین الاقوامی سطح پر قانون دان کس طرح اپنے فیصلے سناتے ہیں اور اس کی پیچیدگیاں کیا ہوتی ہیں اس بات کو جاننا ہے۔

'پڑھائی کی کوئی عمرنہیں ہوتی'

ای ٹی وی بھارت سے بات کرتے ہوئے ونے کمار نے بتایا کہ' تعلیم حاصل کرنے کا سلسلہ بہت پہلے ختم ہو چکا تھا لیکن دل میں یہ خواہش زندہ تھی کہ فیزیکل ایجوکیشن حاصل کریں، جو نہ صرف جسمانی صحت کے لئے مفید ہے، بلکہ سماج کی خدمت کے لیے بھی کافی اہم ہے۔ انہوں نے کہا کہ' اس خواب کو پورا کرنے کے لیے عمر کا لحاظ نہ کرتے ہوئے ہم نے داخلہ لیا جس کے بعد آج میں ڈگری حاصل کر انتہائی خوش ہوں۔