عشمقام میں تحصیل لائبریری خستہ حالی کا شکار

لائبریری کی تعمیر کے لیے ڈرایکٹر لائبریری کی جانب سے 30 لاکھ روپیہ واگزار کی گئے ہیں جو محکمہ آر اینڈ بی کے کھاتے میں پچھلے کئی برس سے پڑے ہوئے ہیں۔

جنوبی کشمیر کے ضلع اننت ناگ کے عشمقام پہلگام میں تحصیل لائبریری کئی برس پہلے قائم کی گئی جہاں ملحقہ علاقے سے طلباء و طالبات کی بڑی تعداد لائبریری سے استفادہ کر رہے ہیں لیکن ستم ظریفی یہ ہے کہ لائبریری ایک خستہ عمارت میں ایک کمرے پر مشتمل ہے۔

عمارت کی دیواروں پر پڑی دراڑیں خود ہی خستہ حالی کی تصویر پیش کر رہی ہیں۔

ای ٹی وی بھارت سے بات کرتے ہوئے طلبا نے بتایا کہ لائبریری میں بیک وقت درجنوں طلبا کا موجود رہنا خطرے سے خالی نہیں ہے۔ اگر دس سے زائد طلبا لائبریری میں آئیں تو عمارت کے گرنے کا خدشہ لاحق رہتا ہے۔

طلبا کا کہنا ہے کہ عمارت کی خستہ حالی دیکھ کر حکام کو اسے کسی محفوظ مقام پر منتقل کرنا چاہیے۔ وہیں، ای ٹی وی بھارت سے بات کرتے ہوئے مقامی شخص سجاد احمد نے بتایا ہے کہ لائبریری میں ایک ہی کمرہ پڑنے کے لیے ہے جس کی وجہ سے یہاں کے طلباء کو بہت سی مشکلات کا سامنا کرنا پڑ رہا ہے۔

ان کا کہنا ہے کہ لائبریری میں کسی بھی چیز کی سہولت نہیں ہے اور نہ ہی روشنی کا کوئی انتظام ہے۔ سجاد احمد نے کہا ہے کہ آج کل مقابلے کا دور ہے۔ اس لائبریری میں بہت سارے وہ بھی طلبا آتے ہے جو مقابلہ جاتی امتحانات کی تیاری کر رہے ہیں۔ مگر بدقسمتی کی بات ہے کہ اس تحصیل لابریری میں ضروری سہولیات نہیں ہیں۔

ادھر، لائبریری کے انچارج جاوید احمد کا کہنا ہے کہ جگہ کم ہونے کی وجہ سے لوگ بھی یہاں آنے سے قصر ہیں۔

مقامی لوگوں نے انتظامیہ سے مطالبہ کیا ہے کہ اس تحصیل لائبریری کو دوسری جگہ منتقل کیا جائے اور لائبریری کی تعمیر کے‌ لیے مختص کی گئیں رقومات کو بروئے کار لاکر لائبریری کی عمارت کی تعمیر کا عمل شروع کیا جائے۔

واضح رہے مذکورہ لائبریری کی تعمیر کے لیے ڈرایکٹر لائبریری کی جانب سے 30 لاکھ روپیہ واگزار کی گئے ہیں جو محکمہ آر اینڈ بی کے کھاتے میں پچھلے کئی برس سے پڑے ہوئے ہیں۔