تمل ناڈو: ذات کی بنیاد پر تفریق کا معاملہ، تفتیش شروع

تمل ناڈو میں ذات کی بنیاد پر تفریق کا ایک اور چونکانے والا معاملہ سامنے آیا ہے، محکمہ محصولات کے ایک دلت اہلکار کو اعلیٰ ذات کے ایک شخص کے پیروں پرگرنے کے لیے مجبور کیا گیا۔

ذات کی بنیاد پر تفریق کا یہ معاملہ تملناڈو میں کویمبٹور دیہات ضلع کے انّور تعلقہ کے اوٹّارپالیم گاؤں کا ہے۔ اس واقعہ کا ویڈیو سوشل میڈیا پر وائرل ہونے کے بعد ضلع پولیس افسر نے آج جائے وقوعہ کا دورہ کیا اور معاملے کی تفتیش شروع کی۔

ویڈیو میں اوٹّاررپالیم تھنڈکارر مُتھوسامی کو مبینہ اعلیٰ ذات سے متعلق شخص گوپی ناتھ کے خلاف تبصرہ کے لیے معافی مانگتے ہوئے اس کے پیروں میں گرتے ہوئے دیکھا جا رہا ہے۔

ویڈیو کلپ میں دیکھا جا رہا ہے کہ گوپی ناتھ مُتھوسامی کی معافی کو قبول کرتے ہوئے کہہ رہا ہے کہ اس سے بھی غلطی ہو سکتی تھی۔

تھانتھائی پیریار دراوڑ کژگم (ٹی پی ڈی کے) نے اسے ذات کی بنیاد پر تفریق کا معاملہ قرار دیتے ہوئے گوپی ناتھ کی گرفتاری کا مطالبہ کیا ہے۔ ٹی پی ڈی کے جنرل سکریٹری کے رام کرشنن کی قیادت میں کارکنان نے کویمبٹور دیہات پولیس سے معاملہ درج کرکے گوپی ناتھ کو گرفتار کرنے کا مطالبہ کرتے ہوئے احتجاجی مظاہرہ کیا۔

یو این آئی