کیرالہ حکومت کے ذریعہ عیدالاضحیٰ کے پیشِ نظر ریاست میں کووڈ 19 پابندیوں میں تین دن کی نرمی دیئے جانے پر سپریم کورٹ نے کیرالہ حکومت کو ہدایت دیتے ہوئے کہا ہے کہ ریاست آئین ہند کے آرٹیکل 21 کے ساتھ آرٹیکل 144 کو پڑھے اور ہمارے احکامات پر عمل کریں۔
سپریم کورٹ نے کہا کہ کوئی بھی گروپ یا مذہب، شہریوں کے سب سے اہم بنیادی حقوق میں مداخلت نہیں کرسکتے۔ اگر اس نرمی کے نتیجے میں کووڈ 19 کے معاملات میں اضافہ ہوتا ہے تو کوئی بھی فرد اسے عدالت کی نوٹس میں لاسکتا ہے، جس پر عدالت مناسب کارروائی کرے گی۔
واضح رہے کہ 17 جولائی کو کیرالہ کے وزیراعلیٰ پنارائی وجین نے نظر پریس کانفرنس منعقد کرتے ہوئے کہا تھا کہ 21 جولائی کو منائے جانے والے تہوار عیدالاضحیٰ کے پیشِ نظر کپڑے، جوتے، زیور، الیکٹرانک دکانیں سمیت گھریلو اشیاء کی دکانوں کو 18 سے 20 جولائی تک صبح سات بجے سے رات کے 8 بجے تک کھولنے کی اجازت رہے گی۔
