گوہاٹی: یوتھ کانگریس کے قومی صدر سرینواس بی وی نے پارٹی کی برخاست رکن انگکیتا دتہ کی جانب سے ہراساں کرنے اور حملہ کرنے کے الزام میں ان کے خلاف درج ایف آئی آر کو منسوخ کرانے کے لئے گوہاٹی ہائی کورٹ سے رجوع کیا ہے۔ اس معاملے کی سماعت جسٹس اجیت بورٹھاکر نے کی۔ معاملے کی اگلی سماعت 2 مئی کو ہوگی۔ دتہ نے 19 اپریل کو دیسپور پولیس اسٹیشن میں سری نواس کے خلاف گزشتہ چھ ماہ کے دوران ان کے خلاف فحش تبصرے کرنے، گندی زبان استعمال کرنے اور ان کے خلاف شکایت کرنے پر سنگین نتائج کی دھمکیاں دے کر ہراساں کرنے کا الزام لگاتے ہوئے ایف آئی آر درج کرائی تھی۔
آسام یوتھ کانگریس کی صدر دتہ نے الزام لگایا کہ فروری میں رائے پور میں پارٹی کے مکمل اجلاس کے دوران سری نواس نے ان کے ساتھ بدتمیزی کی اور ان کے سیاسی کیریئر کو برباد کرنے کی دھمکی دی تھی۔آسام پولیس نے سری نواس کے خلاف خواتین کو ہراساں کرنے سے متعلق مختلف دفعات کے تحت ایف آئی آر درج کی ہے۔ 23 اپریل کو گوہاٹی پولیس کی ایک ٹیم سری نواس کی بنگلورو رہائش گاہ پر گئی اور انہیں 2 مئی تک دیسپور پولیس اسٹیشن میں حاضر ہونے کی ہدایت کرتے ہوئے ایک نوٹس جاری کیا۔ خیال ر ہے کہ دتہ نے 18 اپریل کو سلسلہ وار ٹویٹس میں سری نواس کے خلاف الزامات لگائے تھے، جس کے بعد کانگریس نے انہیں وجہ بتاؤ نوٹس جاری کیا تھا اور بعد میں پارٹی مخالف سرگرمیوں کے لیے انہیں چھ سال کے لیے پارٹی سے نکال دیا تھا۔
یہ بھی پڑھیں: Assam Police Notice to Srinivas BV آسام پولیس نے سرینواس بی وی کو نوٹس جاری کیا
یواین آئی
