دہلی پولیس اسپیشل سیل کے ڈی سی پی پرمود سنگھ کُشواہا نے بتایا کہ اے سی پی اتر سنگھ کی قیادت میں انسپکٹر شیو کمار اور کرم ویر سنگھ کی ٹیم عبد اللہ دانش کی نقل و حرکت کی مسلسل نگرانی کر رہی ہے۔
گزشتہ روز (5 دسمبر )کو اطلاع ملی تھی کہ سیمی کارکن عبداللہ، ذاکر نگر علاقے میں آنے والا ہے جس کے بعد علاقے کا محاصرہ کرکے اسے گرفتار کرلیا گیا۔
عبد اللہ کی تلاش میں اسپیشل سیل کی متعدد ٹیمیں کئی برسوں سے مسلسل معلومات اکٹھا کر رہی تھیں۔
ڈی سی پی پرمود سنگھ کُشواہا نے بتایا کہ 27 ستمبر 2001 کو حکومت ہند کی جانب سے سیمی پر پابندی عائد کرنے کے بعد سیمی عہدیدار جامعہ نگر میں ایک پریس کانفرنس کر رہے تھے جہاں دہلی پولیس کے چھاپے کے دوران متعدد سیمی کارکن پکڑے گئے تھے۔ چھاپے کے دوران پولیس کو کچھ قابل اعتراض سامان بھی ملے تھے۔
پرمود کُشواہا نے بتایا کہ گرفتار ملزم عبد اللہ دانش سیمی کا سرگرم رکن تھا اور اس نے نوجوان کو دھوکہ دے کر انہیں تنظیم میں بھرتی کرایا تھا۔
تنظیم میں عبداللہ کی سرگرمی دیکھ کر انہیں سیمی کے ہیڈ کوارٹر ذاکر نگر میں ایک کمرہ دیا گیا جہاں وہ اپنے ساتھیوں کے ساتھ رہتا تھا۔ سال 2001 میں پولیس چھاپے کے دوران وہ اپنے بہت سے ساتھیوں سمیت فرار ہوگیا تھا۔
