گوہاٹی: مودی کنیت ہتک عزت کیس میں سپریم کورٹ سے راحت ملنے کے بعد کانگریس لیڈر راہل گاندھی ستمبر میں اپنی 'بھارت جوڑو یاترا' کے دوسرے مرحلے کا آغاز کرنے کے لیے تیار ہیں۔ اس خبر کی وجہ سے ملک بھر میں کانگریس اراکین اور اپوزیشن اتحاد 'انڈیا' میں جوش و خروش دیکھا جا رہا ہے۔ کانگریس کے سینئر لیڈر اور آسام قانون ساز اسمبلی میں اپوزیشن لیڈر دیببرت سئیکیا نے سپریم کورٹ کے فیصلے پر اطمینان کا اظہار کیا۔ صحافیوں سے بات کرتے ہوئے، دیببرت نے عدالت عظمیٰ کے فیصلے کی تعریف کرتے ہوئے اسے 'جمہوریت اور عدلیہ کی فتح' قرار دیا۔
یہ بھی پڑھیں: Bharat Jodo Yatra 2.0 کانگریس راہل گاندھی کی بھارت جوڑو یاترا پارت ٹو کا منصوبہ بنا رہی ہے
اپنے بیان میں دیببرت سئیکیا نے راہل گاندھی کی 'بھارت جوڑو یاترا' کے آئندہ دوسرے مرحلے کا بھی اشارہ دیا۔ بھارت جوڑو یاترا کے پہلے مرحلے میں راہل گاندھی نے بار بار دعویٰ کیا تھا کہ یہ یاترا سیاسی نہیں ہے۔ اس دورے کا مقصد عوام سے رابطہ قائم کرنا اور ان کے تحفظات کو سمجھنا ہے۔ کانگریس کے سینئر لیڈر نے کہا کہ یاترا کا دوسرا مرحلہ ستمبر کے پہلے پندرہ دن میں شروع ہونے والا ہے۔ تاہم اس سفر کی تفصیلات ابھی سامنے نہیں آئی ہیں۔ لیکن امید ہے کہ یاترا اروناچل پردیش کے پاسیگھاٹ سے شروع ہوگی۔ سائکیا نے 8 اگست کو نئی دہلی میں ہونے والی ایک اہم میٹنگ کے بارے میں بھی بتایا۔ میٹنگ کا مقصد آئندہ لوک سبھا انتخابات کے لیے اپوزیشن کے ایجنڈے پر مبنی حکمت عملی تیار کرنا ہے۔
