ریاست مہاراشٹر کے دارالحکومت ممبئی کے ساکی ناکہ علاقہ میں گزشتہ روز پیش آئے جنسی زیادتی معاملے کی متاثرہ کی آج علاج کے دوران موت واقع ہوگئی ہے۔لڑکی کے ساتھ زیادتی کے بعد اس پر جان لیوا حملہ کیا گیا تھا، جس کے بعد اس کی حالت نازک بتائی جارہی تھی۔متاثرہ کو ممبئی کے راجہ واڈی ہسپتال میں علاج کے لیے داخل کروایا گیا تھا، لیکن آج زخموں کی تاب نہ لینے کی وجہ سے متاثرہ کی موت ہوگئی۔اس معاملے میں اب تک ایک ملزم کو گرفتار کیا گیا ہے۔
اطلاع کے مطابق لڑکی کے ساتھ پہلے جنسی زیادتی کی گئی اور پھر متاثرہ کو ٹیمپو کے اندر بیٹھا کر اس پر حملہ کیا گیا۔یہ واقعہ سنہ 2012 میں پیش آئے 'نربھیا' معاملے کے جیسا ہے۔
جانچ افسرنے بتایا کہ پولیس کنٹرول روم کو جمعہ کی علی الصبح ایک فون کال موصول ہوئی۔ فون کرنے والے نے بتایا کہ ایک شخص خیرانی روڈ پر ایک عورت کو زدوکوب کر رہا ہے۔ افسر نے بتایا کہ خاتون کا سراغ لگانے کے لیے پولیس ٹیم موقع پر پہنچ گئی۔ خون میں لت پت خاتون کو میونسپل کارپوریشن کے زیر انتظام راجہ واڑی اسپتال لے جایا گیا۔ ابتدائی تفتیش کے مطابق یہ معلوم ہوا کہ لڑکی کے ساتھ جنسی زیادتی کی گئی اور اس کی شرم گاہ میں لوہے کی سلاخوں سے حملہ کیا گیا ہے۔
یہ واقعہ سڑک کے کنارے کھڑے ایک ٹیمپو کے اندر پیش آیا ہے۔ افسر نے بتایا کہ گاڑی کے اندر خون کے داغ بھی ملے ہیں۔ ڈاکٹروں کے مطابق خاتون کی شرم گاہ میں لوہے کی راڈ سے حملہ کیے جانے کی وجہ سے خاتون کی حالت بہت ہی نازک تھی۔
پولیس افسر نے بتایا کہ واقعہ کے چند گھنٹوں کے اندر 45 سالہ ملزم موہن چوہان کو گرفتار کر لیا گیا ہے۔ابتدائی جانچ کی بنیاد پر ملزم کے خلاف ریپ اور قتل کی کوشش کا مقدمہ درج کیا گیا ہے۔ لیکن متاثرہ کی موت ہوجانے کے بعد اب یہ دفعات قتل کی دفعات میں تبدیل ہو جائیگی
مزید پڑھیں:جنسی زیادتی کی شکار لڑکی کو انصاف دلانے کا مطالبہ
واضح رہے کہ دسمبر 2012 میں ملک کے دارالحکومت دہلی میں ایک لڑکی کے ساتھ چلتی بس کے اندر وحشیانہ طور پر اجتماعی جنسی زیادتی کی گئی اور بعد میں اس پر حملہ کیا گیا۔ جسے بعد میں 'نربھیا' کہا گیا۔ اس واقعہ کے بعد پورے ملک میں غم و غصہ پھیل گیا۔ کئی دنوں تک زندگی کی جدوجہد کے بعد متاثرہ نے ہسپتال میں دم توڑ دیا تھا۔
