یوکرین کے صدر ولادیمیر زیلنسکی نے ہفتے کے روز امریکی قانون سازوں کے ساتھ بات چیت کے دوران دعویٰ کیا کہ روسی افواج نے یوکرین کے دو ایٹمی پلانٹس پر قبضہ کر لیا ہے اور وہ تیسرے کی طرف بڑھ رہے ہیں۔ زیلنسکی نے کہا کہ یوزنوکرینسک نیوکلیئر پاور پلانٹ اس وقت خطرے میں ہے۔ یہ نیوکلیئر پاور پلانٹ 'میکولائیو' سے تقریباً 120 کلومیٹر شمال میں واقع ہے۔ Russia Moving Towards third Nuclear Plant Says Zelensky
یوکرین کے صدر ولادیمیر زیلنسکی کے ٹویٹ کے مطابق انہوں نے امریکی صدر جو بائیڈن سے مختلف امور پر بات کی۔ ٹویٹ میں کہا گیاکہ "سیکیورٹی کے مسائل، یوکرین کے لیے مالی امداد اور روس کے خلاف پابندیوں سے متعلق بات چیت ہوئی۔"
یوکرین کے صدر ولادیمیر زیلنسکی نے امریکی قانون سازوں سے روس کے تیل اور گیس کے شعبے پر پابندیاں عائد کرنے اور کریڈٹ کارڈ کی سہولیات کو منسوخ کرنے کی اپیل کی ہے۔ جنوبی کیرولینا میں ریپبلکن پارٹی کے رہنما لنڈسے گراہم نے ہفتے کے روز امریکی قانون سازوں کے ساتھ ایک نجی گفتگو کے دوران کہا کہ انہوں نے توانائی کے شعبے میں پابندیوں کی ضرورت پر زور دیا۔ گراہم نے ایک ویڈیو میں کہا کہ روسی معیشت کو نقصان پہنچانے والی کوئی بھی چیز یوکرین کے لوگوں کے لیے مددگار ثابت ہوگی اور روسی صدر ولادیمیر پوتن کے لیے جنگ کو مزید مشکل بنا دے گی۔
وہیں اسرائیلی وزیر اعظم نفتالی بینیٹ نے ہفتے کے روز روسی صدر ولادیمیر پوتن سے ملاقات کی جو کئی گھنٹے تک جاری رہی۔ بینیٹ کے دفتر نے روسی صدارتی دفتر میں دونوں رہنماؤں کے درمیان ملاقات کی تصدیق کی۔ یہ ملاقات چند روز قبل دونوں رہنماؤں کے درمیان فون پر بات چیت کے بعد ہوئی۔
یوکرین پر روسی حملے کے خلاف ہفتے کے روز وسطی لندن میں سینکڑوں افراد جمع ہوئے اور انہوں نے جنگ بند کا مطالبہ کیا۔ یوکرین کا پرچم لہراتے ہوئے مظاہرین نے 'پوتن بند کرو، جنگ بند کرو' کے نعرے بھی لگائے۔
