ریاست تمل ناڈو کے ضلع پڈوکوٹئی کی پولس نے راشٹریہ سویم سیوک سنگھ (آر ایس ایس) کے ایک کارکن کو مبینہ طور پر تبدیلی مذہب کی سرگرمیوں میں ملوث دو عیسائی خواتین کو "غلط طریقے سے روکنے" کے الزام میں گرفتار کیا ہے۔ RSS Worker Arrested for Improperly Restraining two Christian Women
پولس ذرائع نے بتایا کہ 21 جنوری کو ضلع پڈوکوٹئی کے تھیمیامپٹی گاؤں جانے والی دو خواتین، رانی اور دیوسانتی کو آر ایس ایس کے گنیش بابو نے زبردستی روکا تھا۔ گنیش نے الزام لگایا کہ یہ خواتین تبدیلی مذہب کا کام کرتی ہیں۔
گنیش بابو اور اس کے حامیوں نے خواتین کے موبائل فون اور ایک دو پہیہ گاڑی چھین لی تھی۔ پولس کی مداخلت کے بعد گنیش بابو نے خواتین کو سامان واپس کرنے کی یقین دہانی کرائی۔ عیسائی خواتین نے بتایا کہ وہ نجی دورے پر گاؤں آئی تھیں۔
مزید پڑھیں:۔ مذہب تبدیل کرانے کے الزام میں عیسائی مشنری کے پانچ افراد گرفتار
خواتین نے گنیش بابو کے ذریعہ دو پہیہ گاڑی اور موبائل فون واپس نہ کرنے پر ایلوپور تھانہ میں شکایت درج کرائی تھی۔
پولس نے گنیش کے خلاف آئی پی سی کی دفعہ 147 (فساد)، 341 (غلط طریقے سے روکنا)، 294 (بی) (فحش زبان) اور 387 (بھتہ خوری) اور تمل ناڈو خواتین کے مظالم ایکٹ کی دفعہ چار کے تحت مقدمہ درج کیا ہے۔
(یو این آئی)
