کشتواڑ: جموں و کشمیر کے ضلع کشتواڑ کے انشن واڑون کے لوگوں نے راشن کی عدم دستیابی کو لے کر محکمہ خوراک کے خلاف احتجاجی مظاہرہ کیا۔ مظاہرین کا کہنا ہے کہ ان کے علاقہ میں گزشتہ پندرہ روز سے راشن ڈیپو میں تالا بند ہے اور لوگوں کو راشن فراہم نہیں کیا جا رہا ہے۔ لوگوں کے مطابق راشن ڈیپو خالی ہے اور محکمہ کے ملازم ڈیپو کو تالا لگا کر ڈیوٹی سے غیر حاضر ہیں، جبکہ لوگ راشن کی فراہمی کے منتظر ہیں۔
انہوں نے کہا کہ شدید برفباری کے بعد علاقہ کا رابطہ چھ ماہ تک منقطع ہو جاتا ہے، لہذا علاقہ کی عوام کو اس وقت راشن کی اشد ضرورت ہے، اگرچہ چند ہفتہ قبل متعلقہ محکمہ کے ملازمین نے انہیں یقین دہانی کرائی تھی کہ راشن کے کئی ٹرکس متی گاؤرن کے راستہ روانہ کئے گئے ہیں، تاہم ابھی تک وہ راشن کا اسٹاک یہاں نہیں پہنچا ہے اور راشن ڈیپو بلکل خالی ہے۔ لوگوں نے الزام لگاتے ہوئے کہا کہ محکمہ کے ملازمین نے راشن کے اسٹاک کا خرد برد کیا ہے۔ انہوں نے حکام سے اپیل کرتے ہوئے کہا کہ وہ علاقہ میں فوری طور پر راشن کی دستیابی کو یقینی بنائیں تاکہ موسم سرما کے دوران لوگ فاقہ کشی کا شکار نہ ہوں۔ ای ٹی وی بھارت سے بات کرتے ہوئے محکمہ خوراک کے اسسٹنٹ ڈائریکٹر کشتواڑ راہل جی نے کہا کہ مذکورہ علاقوں کے لئے راشن کی فراہمی کو یقینی بنایا جا رہا ہے۔ انہوں نے کہا کہ موسمی حالات بہتر ہونے کی صورت میں دو روز کے اندر علاقہ مین راشن پہنچ جائے گا۔
مزید پڑھیں:۔ Water Scarcity In Bandipora پانی کی عدم موجودگی کے خلاف بانڈی پورہ میں احتجاج
