ضلع ڈوڈہ میں پانچ دن بازار کھولنے کی اجازت، دو دن لاک ڈاؤن

جموں و کشمیر کے جن خطوں میں لاک ڈاؤن میں نرمی برتتے ہوئے ہفتہ کے پانچ دن بازار کھولنے کی اجازت دی گئی ہے ان میں ڈوڈہ بھی شامل ہے۔

ڈوڈہ کے ڈپٹی کمشنر وکاس شرما نے میڈیا سے بات کرتے ہوئے کہا کہ ضلع میں بازار کو متبادل دِنوں میں کھولنے کا سلسلہ ختم کیا گیا ہے اور اب ہفتہ میں پانچ دِن تمام دکانیں کھولنے کی اجازت ڈوڈہ کے ڈپٹی کمشنر نے دے دی ہے۔

لیکن ہفتہ وار کورونا کرفیو ، جمعہ کی شام سے لے کر پیر کی صبح تک سختی سے جاری رہے گا۔ ڈی سی نے بتایا کہ کورونا ہفتہ وار کرفیو اور کورونا کے رہنما خطوط کے نفاذ کو یقینی بنانے کے لئے متعلقین کو متحرک رکھا گیا ہے۔

یہ لوگ چوبیس گھنٹے بازاروں کا معائنہ کریں گے تاکہ کورونا وائرس کے لئے ایس او پیز پر عمل درآمد کو یقینی بنایا جائے ۔ اُنہوں نے عوام سے کورونا رہنما خطوط پر سختی سے عملدرآمد کرنے کی اپیل کی ہے۔

ویکسینیشن کے بارے میں ڈی سی نے بتایا کہ 45 سال سے زیادہ عمر کے 70 فیصد سے زیادہ آبادی کو ٹیکے لگائے گئے ہیں ۔اس کے علاوہ 18 سال سے زائد عمر کے لوگوں کے لئے منگل کے روز سے ٹیکہ کاری کا عمل چھ نامزد مقامات پر شروع کیا جائے گا۔

مزید بتایا کہ ضلع بھر میں قائم کوویڈ کیر مراکز میں آکسیجن کی وافر مقدار میں سپلائی کو یقینی بنایا جایا گا ۔ ڈی سی نے بتایا کہ سکشم اسکیم کے تحت اُن افراد کنبہ کے بچوں لئے وظیفہ کو منظوری مل گئی ہے جن کی کفالت کرنے والوں کی کورونا وائرس سے موت واقع ہوئی ہے۔ اُن کو متعلقہ محکمہ آنے والے کچھ دِنوں میں امداد فراہم کرنا شروع کر دے گا۔