لکھنؤ: مرکزی وزیر برائے روڈ ٹرانسپورٹ اور ہائیویز نتن گڈکری نے ہفتہ کوکہا کہ آتم نربھر بھارت کے لئے سب سے ضروری ہے کہ ہم درآمدات میں تخفیف کریں اور اپنے برآمدات کو بڑھائیں۔اسی منتر کے ذریعہ ہی ہم ملک کے دیہی اور زرعی شعبوں میں روزگار کے مواقع پیدا کرسکیں گے۔Nitin Gadkari In Lucknow
لکھنو میں منعقد انڈین روڈ کانگریس کے 81ویں سالانہ کنونشن کے افتتاحی سیشن سے خطاب کرتے ہوئے گڈکری نے کہا' آتم نربھر بھارت کے لئے ناگزیر ہے کہ ہم درآمدات میں تخفیف کریں اور برآمدات کو بڑھائیں اس کے ذریعہ ہی ہم ملک میں زیادہ سے زیادہ روزگار کے مواقع خاص کر دیہی اور زرعی شعبے میں پیدا کرسکتے ہیں۔
وفاقی وزیر نے کہا کہ ہندوستان سب سے تیزی سے ترقی کرنے والی معیشت ہے۔ہمارے وزیر اعظم کا خواب ہندوستان کو پانچ ٹریلین ڈالر کی اکانومی بنانا ہے آتم نربھر بھارت ہم تمام کا مشن ہے۔اور اس کے لئے ضروری ہے کہ کسی بھی صورت ہمارے ملک میں بہتر انفراسٹرکچر ہو۔
انہوں نے کہا کہ بغیر انفراسٹرکچر ملک میں انڈسٹریوں کو وجود ناپید ہے۔بغیر انڈسٹری کے سرمایہ کاری نہیں ہوگی اور بغیر سرمایہ کاری کے ہم روزگار کے مواقع نہیں پیدا کرسکتے اور بغیر روزگار کے ہم غربت کا قلع قمع نہیں کرسکتے۔
گڈکری نے کہا کہ ملک کی ترقی کے لئے ضروری ہے کہ ملک میں اچھا انفراسٹرکچر ہو اور یہ روڈ انفراسٹرکچر کے ساتھ مشروط ہے۔میں لوگوں سے کہتا رہتا ہوں کہ جہاں چاہ ہے وہاں راہ ہے۔جہاں پر کوئی خواہش نہیں ہوگی وہاں پر صرف سروے، بحث، سیمینار،کمیٹیز،سب کمیٹی، اور ریسرچ گروپ ہوں گے۔
انہوں نے کہا کہ ہندوستان سب سے زیادہ انجینئرس ، تربیت یافتہ اور سب سے جوان افرادی قوت والا ملک ہے۔یہی ہماری طاقت ہے۔اور یہی وجہ ہے کہ لوگوں کو ہندوستان سے بہت زیادہ توقعات ہیں۔اس لئے معلومات کا اثاثہ جات میں تبدیل ہونا بہت ہی ضروری ہے۔
گڈکری نے کہا کہ ہندوستان امیر ملک نہیں ہے بلکہ یہ ترقی پذیر ملک ہے۔یہاں ایک ایک سکے کی قیمت ہے۔اور پہلی چیز جس کی میں اپیل کرنا چاہونگا وہ یہ ہے کہ کنسٹرکشن کے اخراجات کو کم سے کم تر تک لائیں اور کنسٹرکشن کی کوالٹی میں اضافہ کریں۔
سڑکوں کی تعمیر میں کچڑے کے استعمال پر زور دیتے ہوئے وفاقی وزیر نے نشاندہی کی کہ اترپردیش میں پلاسٹک کے کچڑے کا استعمال ہورہا ہے۔ ایک سال قبل میں نے ماحولیاتی وزیر سے درخواست کی تھی کہ وہ استعمال شدہ ٹائروں کے امپورٹ کی اجازت دیں۔کیونکہ ہم اس کے استعمال سے اچھی کوالٹی کی سڑکیں بنانا چاہتے ہیں۔
انہوں نے کہا کہ متعدد نئی اختراعات ہیں جس کے ذریعہ ہم کچڑے کا استعمال کرسکتے ہیں جیسے کہ روڈ کنسٹرکشن اور ہم ایکولاجی اور ماحولیات کا تحفظ کرسکتے ہیں۔گڈکری نے کہا کہ اخلاقیات،معاشیات اور ماحولیات ہندوستانی سماج کے تین اہم ستون ہیں۔ہمیں ایکولاجی و ماحولیات کا تحفظ کرنا ہے۔ روڈ کسنٹرکشن سے پیدا ہونے والی ہوائی آلودگی کی طرف اشارہ کرتے ہوئے انہوں نے کہا کہ روڈ سیکٹر ملک میں کل ہوائی آلودگی کا 40فیصدی کا ذمہ دار ہے۔
قابل ذکر ہے کہ اندرا گاندھی پرتشٹھان میں منعقد انڈین روڈ کانگریس کے 81ویں سالانہ کنونشن کاریاست کے وزیر اعلی یوگی آدتیہ ناتھ نے افتتاح کیااورمملکتی وفاقی وزیر جنرل وی کے سنگھ نے خاص کر طور سے موجود رہے۔ یہ کنونشن 8تا 11 اکتوبر تک چلے گا۔
یواین آئی۔ولی
یو این آئی
