کانگریس نے یوم جمہوریہ کے موقع پر قومی دارالحکومت دہلی میں کسان تحریک کے دوران ہوئے تشدد کو خفیہ ایجنسی کی ناکامی قرار دیتے ہوئے کہا کہ وزیر داخلہ امت شاہ اس کے لیے ذمہ دار ہیں اور وزیراعظم نریندر مودی کو انہیں فوراً برخاست کرنا چاہیے۔
کانگریس کے میڈیا انچارج رندیپ سنگھ سرجے والا نے بدھ کے روز یہاں پارٹی ہیڈکوارٹر میں پریس کانفرنس میں کہا کہ 'لاء اینڈ آرڈر اور خفیہ نظام کی ناکامی کے لیے شاہ ذمہ دار ہیں۔ کسان تحریک کی آڑ میں دہلی میں جو منظم تشدد اور انارکی ہوئی ہے' اس سے منسلک خفیہ اطلاع شاہ کے پاس تھی اور اس کے باجود تشدد روکنے میں وہ ناکام رہے ہیں۔'
انہوں نے کہا کہ 'جب تمام اطلاعات وزیر داخلہ کو تھی تو وقت پر تشدد روکنے کے لیے قدم کیوں نہیں اٹھائے گئے۔ اس ناکامی کے مد نظر شاہ کو ایک لمحہ بھی عہدے پر قائم رہنے کا حق نہیں ہے۔ ان کا کہنا تھا کہ ایک برس کے اندر دہلی میں دوسری بار تشدد ہوا ہے، جس سے ثابت ہوتا ہے کہ امت شاہ اس عہدے کے لائق نہیں ہیں لہٰذا انہیں برخاست کیا جانا چاہیے۔'
یہ بھی پڑھیں: دوکسان تنظیموں نے دھرنا ختم کرنے کا اعلان کیا
رندیپ سنگھ سرجے والا نے کہا کہ 'حکومت تشدد کرنے والوں کے ساتھ ملی ہوئی ہے اور سوچی سمجھی سازش کے تحت دونوں کی ملی بھگت سے دہلی میں تشدد کو انجام دیا گیا ہے۔ حکومت تحریک کار کسانوں کے مسائل حل کرنے کے بجائے انہیں بدنام کرنے کی کوشش کر رہی ہے۔ اسی کا نتیجہ ہے کہ حکومت فسادیوں اور غیر سماجی عناصر پر کاروائی کرنے کے بجائے کسان مورچہ کے رہنماؤں پر مقدمے درج کر رہی ہے۔'
