سورت: گجرات سے بی جے پی کے رکن اسمبلی پورنیش مودی کانگریس رہنما راہل گاندھی کی ہتک عزت کے معاملے میں سزا پر روک لگانے کی درخواست کے سلسلے میں منگل کو سیشن عدالت میں اپنا جواب داخل کریں گے۔ ان کے وکیل نے پیر کو یہ اطلاع دی۔ پورنیش مودی نے راہل گاندھی کے خلاف ان کے مودی سرنام والے تبصرے پر ہتک عزت کا مقدمہ دائر کیا تھا، جس میں وہ قصوروار پائے گئے تھے۔ سورت میٹرو پولیٹن کورٹ نے راہل گاندھی کے مودی سرنام والے تبصرے پر 23 مارچ کو ہتک عزت کا جرم ثابت ہونے کے بعد دو سال قید کی سزا سنائی۔ 24 مارچ کو راہل گاندھی کی لوک سبھا کی رکنیت منسوخ کردی گئی تھی۔ جس کے بعد انہوں نے 3 اپریل کو سیشن عدالت میں اپنی سزا کے خلاف اپیل دائر کی تھی۔ ایڈیشنل سیشن جج آر پی موگیرا کی عدالت نے 3 اپریل کو راہل گاندھی کو ضمانت دی تھی اور ان کی سزا پر روک لگانے کی درخواست 13 اپریل تک ملتوی کر دی تھی۔ پورنیش مودی کے ساتھ عدالت نے گجرات حکومت کو بھی نوٹس جاری کیا تھا۔
پورنیش مودی کے وکیل کیتن ریشم والا نے پیر کو کہا کہ ہم 11 اپریل کو گاندھی کی سزا پر روک لگانے کی درخواست پر جواب داخل کریں گے۔ راہل کے خلاف بی جے پی کے ایم ایل اے اور گجرات کے سابق وزیر پورنیش مودی نے ان کے اس تبصرہ پر شکایت درج کرائی ہے جس میں انہوں نے کہا تھا کہ تمام چور کا نام مودی کیوں ہوتا ہے؟ راہل گاندھی نے لوک سبھا انتخابات کی مہم کے دوران 13 اپریل 2019 کو کرناٹک کے کولار میں ایک ریلی سے خطاب کرتے ہوئے یہ تبصرہ کیا۔
مزید پڑھیں:۔ Court Grants Bail To Rahul Gandhi سورت سیشن کورٹ نے راہل گاندھی کو ضمانت دی، اگلی سماعت 13 اپریل کو
ٹرائل کورٹ نے گاندھی کی سزا کو ایک ماہ کے لیے معطل کر دیا تھا اور فیصلے کے خلاف اپیل زیر التوا تھی۔ اس فیصلے کے ایک دن بعد راہل گاندھی کی لوک سبھا کی رکنیت منسوخ کردی گئی تھی۔ بتادیں کہ عوامی نمائندگی ایکٹ 1951 کے مطابق دو سال کی قید کی سزا کسی بھی رکن پارلیمنٹ یا ایم ایل اے کو سزا کی تاریخ سے پارلیمنٹ یا قانون ساز اسمبلی کی رکنیت سے نااہل قرار دیتی ہے۔
