کانگریس کے سابق صدر راہل گاندھی نے ایک بار پھر سے مرکز کی مودی حکومت پر طنز کیا ہے، اپنے ٹویٹ پیغام میں راہل گاندھی نے لکھا ہے کہ مودی جی نے جے ڈی پی یعنی گیس ڈیزل پیٹرول کی قیمتوں میں زبردست ترقی کر کے دکھایا ہے۔
راہل گاندھی آگے لکھتے ہیں 'عوام کا مہنگائی سے برا حال، مودی حکومت ٹیکس وصولی میں مصروف ہے، راہل گاندھی نے ٹویٹر پر ایک اخبار کا اسکرین شارٹ کیا جس میں تیل اور گیس کی بڑھتی قیمتوں کا موازنہ کیا گیا تھا۔
اسکرین شارٹ میں بتایا گیا ہے کہ ایک جولائی 2020 کو جے پور میں گھریلو گیس کے فی سلینڈر کی قیمت 594.5 روپے تھی، جبکہ سات جنوری 2021 میں یہ بڑھ کر 698 روپے ہو گئی، وہیں جے پور میں ایک جولائی 2020 کو ڈیزل کی قیمت 81.32 روپے فی لیٹر تھی، جبکہ جنوری 2021 میں یہ 83.64 روپے تک جا پہنچی، وہیں پیٹرول کی قیمتوں کو لے کر لکھا گیا ہے کہ ایک جولائی 2020 میں یہاں پیٹرول کی قیمت 87.57 روپے تھی جو سات جنوری کو 91.63 روپے ہو گئی۔
واضح ہو کہ تمل ناڈو میں ہونے والے اسمبلی انتخابات کو لے کر راہل گاندھی یہاں انتخابی مہم پر پہنچے تھے، انہوں سنیچر کو تمل ناڈو پہنچتے ہی مودی حکومت پر نکتہ چینی کیا تھا۔
