دہرادون: پشکر سنگھ دھامی Pushkar Singh Dhami نے بدھ کو اتراکھنڈ کے وزیر اعلیٰ کے طور پر حلف لے لیا۔ انہیں اتراکھنڈ کے گورنر گرمیت سنگھ نے عہدے اور رازداری کا حلف دلایا۔ پشکر سنگھ دھامی اتراکھنڈ کے 12ویں وزیر اعلیٰ بن گئے ہیں۔ دھامی کے ساتھ 8 وزراء نے بھی حلف لیا۔ وہ مسلسل دوسری بار اتراکھنڈ کے وزیراعلیٰ بننے والے پہلے لیڈر ہیں۔
دھامی نے ستپال مہاراج، پریم چند اگروال، گنیش جوشی، دھان سنگھ راوت، سبودھ انیال، ریکھا آریہ، چندن رام داس اور سوربھ بہوگنا کو عہدے اور رازداری کا حلف دلایا۔ اگروال نے سنسکرت میں حلف لیا۔
حلف برداری کی تقریب میں وزیراعظم نریندرمودی، مرکزی وزیر داخلہ امت شاہ، وزیر دفاع راج ناتھ سنگھ، مرکزی وزراء نتن گڈکری، میناکشی لیکھی، سنجیو بالیان نے بھی شرکت کی۔ اس موقع پر گوا کے نامزد وزیر اعلیٰ پرمود ساونت، اتر پردیش کے نامزد وزیر اعلیٰ یوگی آدتیہ ناتھ، ہماچل پردیش کے وزیر اعلی جئے رام ٹھاکر، ہریانہ کے وزیر اعلیٰ منوہر لال کھٹر، آسام کے وزیر اعلیٰ ہیمنت بسوا شرما اور مدھیہ پردیش کے وزیر اعلیٰ شیوراج سنگھ چوہان بھی موجود تھے۔ ان کے علاوہ راجستھان کی سابق وزیر اعلی وسندھرا راجے سندھیا، اتراکھنڈ کے سابق وزیر اعلیٰ رمیش پوکھریال نشنک، ترویندر راوت اور تیرتھ سنگھ راوت نے بھی حلف برداری کی تقریب میں شرکت کی۔
حلف برداری کی تقریب میں سادھو سنتوں کے علاوہ بڑی تعداد میں عام لوگ موجود رہے۔
بی جے پی نے حالیہ اختتام پزیر انتخابات میں 70 رکنی اسمبلی میں 47 سیٹیں جیت کر زبردست اکثریت حاصل کی تھی۔ بی جے پی نے ریاست میں مسلسل دوسری بار اقتدار حاصل کرکے تاریخ رقم کی ہے۔ ریاست کی تشکیل کے بعد سے اب تک کسی بھی پارٹی کو لگاتار دوسری بار اقتدار نہیں ملا ہے۔
