منموہن سنگھ کے کورونا سے متاثر ہونے کے بعد کانگریس رہنما راہل گاندھی، پرینکا گاندھی، دہلی کے وزیر اعلی اروند کیجریوال، راجستھان کے وزیر اعلی اشوک گہلوت اور مغربی بنگال کی وزیر اعلی ممتا بنرجی سمیت کئی رہنماؤں نے ٹویٹ کر ان کی صحتیابی کی دعا کی۔
اس کے علاوہ فاروق عبداللہ کی صدارت والی پارٹی جموں و کشمیر نیشنل کانفرنس کے ٹویٹر ہینڈل سے ٹوٹ کر منموہن سنگھ کے صحتیابی کی دعا کی گئی ہے۔
کانگریس کے رہنما راہل گاندھی نے اپنے ٹویٹ پیغام میں لکھا کہ 'منموہن سنگھ جی، اپ کے جلد صحتیاب ہونے کی دعا کرتے ہیں۔ اس مشکل وقت میں بھارت کو آپ کے مشورے اور رہنمائی کی ضرورت ہے'۔
دہلی کے وزیر اعلی نے منموہن کی صحتیابی کے لیے دعا کرتے ہوئے لکھا کہ 'سابق وزیراعظم منموہن سنگھ جی کے جلد صحتیاب ہونے کی ایشور سے دعا کرتا ہوں'
مغربی بنگال کی وزیراعلی ممتا بنرجی نے ٹویٹ کیا ہے کہ 'ابھی خبر سنی ہے کہ سابق وزیراعظم کورونا مثبت پائے گئے ہیں۔ سر ہماری دعا ہے کہ آپ جلدی ہی صحتیاب ہو جائیں'۔
یہ بھی پڑھیں: سابق وزیر اعظم منموہن سنگھ کورونا سے متاثر
جموں و کشمیر نیشنل کانفرنس کے ٹویٹر ہینڈل سے ٹویٹ کیا گیا کہ 'فاروق عبداللہ، عمر بعداللہ اور پارٹی کے تمام کارکنان منموہن سنگھ کی صحتیابی کی دعا کر رہے ہیں۔ جب ملک متعدد چیلنجوں کا مقابلہ کر رہا ہے۔ ایسے میں منمو ہن سنگھ کے دانشورانہ مشوروں کی سالوں تک ضرورت پڑے گی۔
خیال رہے کہ سابق وزیر اعظم منموہن سنگھ کورونا وائرس سے متاثر ہوئے ہیں۔ انہیں ہلکے بخار کی شکایت کے بعد ایمز میں بھرتی کرایا گیا ہے۔
88 برس کے منموہن سنگھ کورونا ویکسین کی دونوں ڈوز لے چکے ہیں۔ دہلی ایمز نے ایک بیان میں کہا کہ منموہن سنگھ کو ٹراما سنٹر میں بھرتی کیا گیا ہے۔
منموہن سنگھ کانگریس کے سینیئر رہنما ہیں اور فی الحال راجستھان سے راجیہ سبھا رکن ہیں۔ وہ 2004 سے 2014 تک ملک کے وزیر اعظم رہے ہیں۔ سنہ 2009 میں ان کی ایمز میں ہی کورونری بائپاس سرجری ہوئی تھی۔
