رائےگڑا: اڈیشہ کے رائےگڑا ضلع میں ایک حیران کر دینے والا واقعہ پیش آیا۔ چور نے پولیس کی پٹرولنگ وین ہی چرا لی۔ تاہم پولیس نے پی سی آر برآمد کر کے ملزم کو گرفتار کر لیا ہے۔ چور نے پولیس کی آنکھوں میں دھول جھونکتے ہوئے مبینہ طور پر پٹرولنگ وین چوری کر لی۔ پولیس کو موصول ہونے والی اطلاع کے مطابق ملزم کو گرفتار کر لیا گیا ہے اور اس کی شناخت رودر سیبا کے طور پر کی گئی ہے، جو آندھرا پردیش کے گوداوری ضلع کے ایٹیڈا گاؤں کا رہنے والا ہے۔
اطلاع ملتے ہی پولیس نے سرچ آپریشن شروع کر دیا۔ پولیس کو آندھرا پردیش کے پاروتی پورم میں چوری شدہ وین کا سراغ ملا۔ جس کے بعد آندھرا پردیش پولیس نے چھاپہ مار کر پٹرولنگ وین کو موقع سے برآمد کر کے ملزم کو گرفتار کر لیا۔ پولیس نے معاملے کی جانچ شروع کر دی ہے کہ رودر نے پولیس کا پی سی آر کیوں چرایا؟۔
