اے آئی ایم آئی ایم کے سربراہ اسد الدین اویسی نے پیر کے روز وزیر اعظم نریندر مودی پر تنقید کرتے ہوئے الزام عائد کیا کہ مودی ایندھن کی قیمتوں میں اضافے اور چین کے لداخ میں بیٹھے رہنے کے معاملے پر خاموش ہیں۔
اسد الدین اویسی نے حیدرآباد میں ایک تقریب سے خطاب کرتے ہوئے کہا کہ "وزیر اعظم مودی دو چیزوں پر کبھی نہیں بولتے-پٹرول اور ڈیزل کی قیمتوں میں اضافہ اور چین ہمارے علاقے لداخ میں ہے۔ وزیر اعظم مودی چین معاملے میں بولنے سے ڈرتے ہیں۔ ہمارے 9 فوجی جموں و کشمیر میں ہلاک ہوئے اور 24 اکتوبر کو بھارت۔پاکستان ٹی 20 میچ کھیلا جائے گا۔''
جموں و کشمیر میں عسکریت پسندوں کے خلاف مختلف کارروائیوں کے دوران ہلاک فوجی اہلکاروں کے بارے میں بات کرتے ہوئے اویسی نے کہا کہ "ہمارے نو فوجی سپاہی جموں وکشمیر میں مارے گئے اور بھارت 24 اکتوبر کو پاکستان کے ساتھ ٹی 20 میچ کھیلے گا؟ ہمارے فوجی ہلاک ہوئے ہیں۔ کیا آپ ٹی 20 کھیلیں گے؟ پاکستان ہر روز 20-20 کشمیر میں بھارت کے لوگوں کی زندگیوں سے کھیل رہا ہے۔''
اویسی نے کشمیر میں شہریوں کو نشانہ بنائے جانے کا مسئلہ بھی اٹھایا اور کہا کہ یہ بی جے پی زیرقیادت مرکز کی ناکامی ہے۔
انہوں نے کہا کہ "بہار کے غریب مزدور مارے جا رہے ہیں، ٹارگٹ کلنگ کی جا رہی ہے، انٹیلی جنس بیورو اور (مرکزی وزیر داخلہ) امیت شاہ کیا کر رہے ہیں؟ یہ مرکز کی ناکامی ہے۔"
یہ بھی پڑھیں: انتخابی جلوسوں پر کوئی پابندی نہیں توعید میلادالنبی کے جلوس پر پابندی کیوں؟ اویسی
جموں و کشمیر کے سری نگر اور پلوامہ اضلاع میں عسکریت پسندوں کے حملے میں بہار سے تعلق رکھنے والا ایک ریڑھی پٹری دکاندار اور اتر پردیش کا ایک مزدور ہلاک ہوگیا۔ حال ہی میں جموں و کشمیر میں عسکریت پسندوں کے ہاتھوں کئی شہری مارے گئے جس سے وادی میں خوف و ہراس پھیل گیا ہے۔
