بھارتیہ جنتا پارٹی (بی جے پی) نے پیگاسس جاسوسی معاملے میں کانگریس کے الزامات پر جوابی حملہ کرتے ہوئے کہاکہ کانگریس کے حکومت پر لگائے گئے الزامات بے بنیاد ہیں اور یہ ملک مخالف ایجنڈہ چلانے والوں کی سازش ہے۔
پبی جے پی کے سینئر رہنما روی شنکر پرساد نے پریس کانفرنس میں کہاکہ 'میں کانگریس سے سوال پوچھنا چاہتا ہوں کہ جاسوسی کا معاملہ پارلیمنٹ کے مانسون اجلاس سے پہلے کیوں کھڑا گیا؟
انہوں نے کہاکہ ملک میں فون ٹیپنگ پر مضبوط قانون ہے۔ ان طریقہ کار پر عمل کرتے ہوئے ٹیپنگ ہوسکتی ہے۔
اس سے پہلے سپریم کورٹ میں مقدمہ کیا گیا تھا جس میں کہاگیا تھا کہ وہاٹس ایپ کو پیگاسس سے ہیک کرایا جارہا ہے جبکہ ایسا ہو ہی نہیں سکتا۔ خود وہاٹس ایپ نے بھی سپریم کورٹ میں یہ بات کہی۔
انہوں نے کہاکہ بھارت میں مضبوط قانونی ڈھانچہ ہے۔ جو لوگ حکومت پر فون سرویلانس کا الزام لگا رہے ہیں وہ بھی اعتماد کے ساتھ ثبوت نہیں دے پارہے ہیں۔ ایسا لگتا ہے کہ دنیا میں ابھر رہے بھارت کے خلاف ایک ماحول بنانے کی کوشش ہورہی ہے۔ ملک میں جس تیزی کے ساتھ ویکسنیش بڑھ رہا ہے۔ ا س سے کچھ لوگوں کو پریشانی ہورہی ہے کہ بھارت ایسے کیسے کرپارہا ہے۔ کئی لوگوں کو اس بات سے بھی پریشانی ہے کہ ملک میں سب سے زیادہ براہ راست سرمایہ کاری ہورہی ہے۔
پرساد نے کانگریس سے سوال پوچھا کہ کانگریس کے دور اقتدار میں وزیر خزانہ رہے پرنب مکھرجی نے اس وقت کے وزیر داخلہ پی چدمبرم کے خلاف جاسوسی کا الزام لگایا تھا۔اس بارے میں کانگریس کا کیا کہنا ہے۔ 2013میں ہزاروں لوگوں کے فون ٹیپ ہوتے تھے۔ اس کے بارے میں کانگریس کیا کہتی ہے۔ کانگریس کی تو تاریخ ہی جاسوسی کروانے کی رہی ہے۔
انہوں نے کہاکہ کانگریس پارٹی کی سطح ایسی ہوگئی ہے کہ کیا کہنا۔ وہ حکومت سے اڑی سرجیکل اسٹرائک پر ہمارے جوانوں سے بہادری کا ثبوت مانگتی ہے۔ گلوان پر جو اب تک کہتی رہی وہ سب کے سامنے ہے۔
اس سے پہلے آج کانگریس نے کئی اہم شخصیات اور صحافیوں کے مبینہ طورپر فون ٹیپ کئے جانے کے معاملے کی آزادانہ جانچ کی مانگ کی۔
خیال رہے کہ پوری دنیا کے کئی میڈیا اداروں کی طرف سے اتوار کو ایک رپورٹ میں دعوی کیا گیا کہ بھارت سمیت کئی ممالک میں حکومتوں نے 150سے زیادہ صحافیوں، انسانی حقوق کارکنوں اور دیگر سماجی کارکنوں کی جاسوسی کرائی۔
اس کے لئے اسرائیل کے این ایس او گروپ ’پیگاسس اسپائی ویئر‘ کا استعمال کیا گیا۔ رپورٹ کے مطابق بھارت میں کم از کم 38لوگوں کی نگرانی کی گئی۔ بھارتی حکومت نے ان الزامات کو مسترد کردیا ہے۔
