کانگریس پارٹی کے سابق صدر راہل کی لوک سبھا سے رکنیت کے خاتمہ کے بعد اب لوک سبھا ہاؤسنگ کمیٹی نے راہل گاندھی کو حکومت کی طرف سے الاٹ کردہ بنگلہ خالی کرنے کا نوٹس دیا ہے۔ گذشتہ جمعہ کو ہی لوک سبھا سکریٹریٹ نے کانگریس کے رکن پارلیمنٹ راہل گاندھی کی لوک سبھا کی رکنیت منسوخ کر دی تھی۔ راہل گاندھی کیرالہ کے وایناڈ سے رکن پارلیمنٹ تھے۔
دراصل، کانگریس لیڈر راہل گاندھی کو سورت کی عدالت نے مودی عرفیت معاملے میں دو سال کی سزا سنائی تھی۔ عدالت کے اس فیصلے کے بعد لوک سبھا کے اسپیکر اوم برلا نے ان کی پارلیمنٹ کی رکنیت منسوخ کردی۔ اسپیکر نے یہ کارروائی عوامی نمائندگی ایکٹ 1951 کے تحت کی۔
واضح رہے کہ راہل گاندھی لٹین دہلی کے 12، تغلق لین میں واقع ایک سرکاری بنگلے میں رہتے ہیں۔ یہ بنگلہ 2004 سے راہل گاندھی کے نام پر الاٹ ہے۔ انہیں یہ بنگلہ پہلی بار اس وقت ملا جب وہ 2004 میں امیٹھی سے پہلی بار ایم پی بنے تھے۔
اس نوٹس کے بعد اب راہل گاندھی کو وہ گھر خالی کرنا پڑے گا جو انہیں بطور رکن پارلیمنٹ ملا تھا۔ واضح رہے کہ کچھ دن پہلے راہل گاندھی نے ایک ریلی میں دعویٰ کیا تھا کہ ان کے پاس اپنا کوئی گھر نہیں ہے۔ ایسے میں بنگلہ خالی کرنے کے بعد راہل گاندھی کہاں جائیں گے، یہ بھی ایک بڑا سوال ہے۔راہل گاندھی 2014 سے تغلق لین 12 میں واقع ٹائپ VIII بنگلے میں رہ رہے ہیں جو کافی اچھا اور بڑا بنگلہ مانا جاتا ہے۔
